Hindistonlik tadbirkor Dipak Pauskar qattiq parhezga va doimiy jismoniy mashqlarga rioya qilish tufayli uch oy ichida 23 kilogramm ortiqcha vazndan xalos bo‘ldi, deb yozadi “Lisa.ru” nashri The Times of India ma’lumotlariga tayanib.
51 yoshli Pauskar bolaligida va talabalik vaqtlarida sog‘liq va vazn haqida qayg‘urmay, faol hayot tarzini olib borgan. Biroq vaqt o‘tib u kamharakat hayot tarziga o‘ta boshladi va yog‘li ovqatlar iste’mol qilishga o‘tdi. Tadbirkor spirtli ichimliklardan ham tiyilmas, bunday zararli odatlar esa uning salomatligida muammolar va ortiqcha vazn hosil bo‘lishiga olib keldi.
“Men doimiy charchoq his qilardim va hatto oilam va do‘stlarim bilan sayr qilishdan zavq ololmas edim”, — deya esladi Pauskar.
Ortiqcha vazn unda qandli diabet va gipertoniya rivojlanishiga olib keldi. Shundan so‘ng tadbirkor umumiy salomatligi bilan jiddiy shug‘ullanishga qaror qildi va mutaxassislarga murojaat qildi.
Pauskar kaloriyalarni hisoblashni o‘rganib oldi va kunlik taomnomani 2000 kilokaloriyagacha chekladi. Shuningdek, u har kuni 5000 qadam piyoda yurdi va sport bilan shug‘ullana boshladi. Pauskar kuniga sakkiz soat uxlab, stressdan uzoq bo‘lishga harakat qildi.
Natijada Pauskar qisqa fursatda sezilarli vazn yo‘qotdi va o‘zida sog‘lom turmush tarzi odatini ham shakllantirdi. Uning fikricha, muvaffaqiyatning asosiy siri tartibli kun va intizomdadir.
“Insonlar umri davomida amal qilishi oson bo‘lgan kun tartibini yoqtira boshladim”, — deydi hindistonlik.
Izoh (0)