Қўштепа канали девори бузилгани ва ён-атрофга сув тошиб кетгани ҳақидаги хабарлар фонида Афғонистон Миллий тараққиёт компанияси расмийлари бундай ҳодисани инкор этиб, каналнинг иккинчи босқичини қуриш давом этиши ҳақида гапирмоқда. Бу ҳақда “Дарё”нинг Афғонистондаги мухбири хабар берди.
.jpg)
Қўштепа канали қурилишига масъул Афғонистон Миллий тараққиёт компанияси расмийлари сув ҳажмини назорат қилиш учун текисликларга атай сув йўли очиб берганини айтишмоқда. Уларнинг сўзларига кўра, бу чора Балх вилоятининг Давлатобод туманида қурилаётган кўприк томонга сув оқиб кетишининг олдини олиш мақсадида амалга оширилган. Расмийларга кўра, Қўштепа девори бузилиб, каналдан сув оқиб кетгани ҳақидаги маълумотлар ёлғон ва миш-миш.
.jpg)
“Дарё” мухбири Қўштепа канали ходимларидан бири Шукруллоҳ билан суҳбат уюштирди ва ундан Қўштепа канали девори бузилгани ва сувнинг исроф бўлгани ҳақидаги миш-мишларга изоҳ сўради. Шукруллоҳ ҳам канал бузилгани ҳақида хабарларни ёлғон деб атади. У Балх вилоятининг Давлатобод ҳудудида кўприк қурилаётгани, шу сабабли Қўштепа каналининг суви муҳандислар томонидан бошқа томонга бурилганини таъкидлади.
.jpg)
Шукруллоҳнинг айтишича, ҳозирда Қўштепага Амударё суви қуйилаётгани йўқ, каналдаги сув бир қанча булоқлардан ҳосил бўлган. Унинг сўзларига кўра, Қўштепа канали бўйида саккиздан ортиқ булоқ бор ва кўпчилик улар ҳақида билмайди. Шукруллоҳ ушбу булоқлар канални қазиш пайтида пайдо бўлганини айтди.
.jpg)
Қўштепа қурилиши “Толибон” ҳукуматининг сўнгги икки йилдаги энг йирик иқтисодий лойиҳаси бўлиб, уни амалга оширишга жиддий ёндашилмоқда.
Техник-иқтисодий асослари 2018 йилда бошланган Қўштепа канали мамлакат шимолидаги энг йирик сув ўтказиш лойиҳасидир — у Амударёдан 10 миллиард куб метр сувни мамлакатга ўтказиш имкониятига эга.
“Толибон” бош вазири ўринбосари Абдул Салам Ҳанафий Қўштепа канали очилиши маросимида Афғонистоннинг қишлоқ хўжалигига бўлган эҳтиёжлари ушбу канал барпо этилиши билан ҳал қилинишини айтган.
“Қўшни давлатларнинг ҳуқуқларини ҳурмат қилган ҳолда, биз сув ҳуқуқларимиздан фойдаланяпмиз, бундан ҳеч бир давлат хавотирланмасин”, — деб таъкидлаган у.
“Толибон” расмийси минтақа ва дунё билан яхши муносабатлар “Толибон” ҳукуматининг устувор йўналиши эканини қўшимча қилган.
Афғонистонни Марказий Осиё давлатларидан ажратиб турувчи Амударё сувидан кўпроқ қўшни давлатлар фойдаланиб келади, Афғонистон кўп йиллардан бери ундан наф кўрмаган.
Статистик маълумотларга кўра, ҳозирда Амударё сувининг 5,1 миллиард куб метри Ўзбекистонга, 49,6 миллиард куб метри Тожикистонга, 1,5 миллиард куб метри Туркманистонга оқади.
“Толибон” расмийларининг айтишича, Қўштепа каналини қуриш иши беш йил ичида уч босқичда якунланади, қурилиш харажатлари 60 миллиард афғонига баҳоланган. Канал Миллий тараққиёт компанияси томонидан қурилмоқда.
Расмийларга кўра, канал суви Балх вилоятининг Калдар туманидан бошланиб, Ҳайратон, Давлатобод тумани ва Жузжон вилоятининг Оқча туманидан ўтган бу канал Фарёб вилоятининг Андхой туманига етиб боради. Қўштепа канали қуриб битказилгандан сўнг, Афғонистон шимолидаги 700 гектардан ортиқ қишлоқ хўжалиги ерлари суғорилиши кутилмоқда.
Изоҳ (0)