Винисиус — Чемпионлар Лигасида мавсумнинг энг яхши футболчиси. Беллингем — энг яхши ёш футболчи 

Мадриднинг “Реал” клуби вингери Винисиус Жуниор УЕФА Чемпионлар Лигасининг 2023—2024 йилги мавсумдаги энг яхши футболчиси деб топилди. Бу ҳақда турнир матбуот хизмати Х (собиқ Twitter) ижтимоий тармоғида маълум қилди.

Ушбу мавсум Чемпионлар Лигасида бразилиялик футболчи 10 та ўйин ўтказиб, 6 та гол урди ва 5 та голли узатмани амалга оширди. Винисиус “Реал” билан биргаликда финалда Дортмунднинг “Боруссия” жамоасини 2:0 ҳисобида мағлуб этиб, турнир ғолибига айланди.

Мадриднинг “Реал” клуби ярим ҳимоячиси Жуд Беллингем жорий мавсумда Чемпионлар Лигасининг энг яхши ёш футболчиси деб топилди.

Беллингем 2023 йил ёзидан бери “Реал”да ўйнамоқда. Бунгача англиялик ярим ҳимоячи Дортмунднинг “Боруссия” клуби шарафини ҳимоя қилган.

Бундан ташқари, УЕФА матбуот хизмати Чемпионлар Лигасининг рамзий терма жамоасини ҳам тузди. Ушбу жамоадан 4 нафар “Дортмунд” ва “Реал” клуби футболчилари, 1 нафардан “ПСЖ”, “Манчестер Сити” ва “Бавария” футболчилари ўрин олган.