London City ва Тошкент шаҳри ўртасида ҳамкорлик алоқалари ўрнатилади

Ўзбекистоннинг Буюк Британиядаги элчиси Равшан Усмонов London City мэри Майкл Майнелли билан учрашди. Бу ҳақда “Дунё” агентлиги хабар берди.

Қайд этилишича, Британия томони Ўзбекистонда иқтисодиётни ислоҳ қилиш борасида ташқи савдо, солиқ ва молия сиёсатини либераллаштириш, тадбиркорликни қўллаб-қувватлаш ҳамда таълим тизимини модернизация қилиш соҳасида олиб борилаётган кенг кўламли ишларни юқори баҳолаган.

Республиканинг Лондон фонд биржаси билан йўлга қўйилган яқин ҳамкорлигини қўллаб-қувватлаймиз. Шунингдек, 21 май куни ушбу платформа орқали Ўзбекистоннинг умумий қиймати қарийб 1,5 миллиард долларга тенг навбатдаги суверен халқаро облигацияларининг жаҳон молия бозорларида жойлаштирилганини олқишлаймиз. Бундан ташқари, биз Британия ва Ўзбекистон ўртасидаги ҳудудлараро ҳамкорликни ривожлантиришдан манфаатдормиз, — деган Майкл Майнелли.

Учрашув якунида Тошкент шаҳри ва London City ўртасида ҳамкорлик алоқаларини ўрнатиш ва делегациялар алмашинувини фаоллаштириш, London City’да Ўзбекистоннинг инвестициявий, туризм ва маданий салоҳиятига бағишланган тадбирларни биргаликда ташкил этиш бўйича келишувларга эришилган.

London City Лондон шаҳри таркибига киради ва маҳаллий ҳудуддаги ҳукумат хизматлари учун масъул бўлган қолган 32 та туманлар билан биргаликда фаолият юритади. У ўзининг маҳаллий бошқарув ва қонунчилик органлари ҳамда полиция хизматига эга.

У 1673 йилда биринчи банк бўлинмасининг ташкил этилиши ва 1694 йилда Англия банкига асос солиниши билан дунёнинг биринчи молиявий марказига айланган. Ҳозирда London City еврооблигациялар савдоси, валюта айирбошлаш, фьючерс контрактлари ва жаҳон суғуртаси бўйича тан олинган етакчи ҳисобланади.

2022 йилда жаҳон бозоридаги кунлик валюта операцияларининг (7,5 триллион доллар) 38 фоиздан ортиғи (2,85 триллион доллар) Лондонда амалга оширилган. Ҳозирги кунда ҳам глобал валюта операцияларини назорат қилади ва дунёда олтин нархларини белгилашда асосий рол ўйнайди.

London City’да Лондон фонд биржаси, Англия банки ва Ллойд суғурта компанияси, шунингдек, 500 тага яқин хорижий банк ва молия институтлари жойлашган бўлиб, уларда 615 мингдан ортиқ одам ишлайди.

Аввалроқ Равшан Усмонов Буюк Британия ва Шимолий Ирландия бирлашган қироллиги қироли Чарльз III га ишонч ёрлиқларини топширгани тўғрисида хабар берилганди.