Покистон Ички ишлар вазирлиги “Толибон” расмийларига мурожаат қилиб, “Таҳрики Толибон” гуруҳи террорчиларини Исломободга топширишни сўраган. Бу ҳақда Покистон ички ишлар вазири Моҳсин Нақви берган маълумотга асосланиб, Hasht-e Subh Daily нашри хабар берди.
Покистон расмийлари мамлакатнинг Хайбер Пахтунхва вилоятида 5 нафар хитойлик ҳалок бўлишига олиб келган теракт “Таҳрики Толибон” томонидан уюштирилганига далиллар борлигини маълум қилган. Бу маълумотни расман Покистон ички ишлар вазири Моҳсин Нақви тасдиқлаган.
Биз “Толибон”дан “Таҳрики Толибон” етакчиларини, жумладан, унинг раҳбари Нурули Маҳсудни ҳибсга олишларини ва икки давлат ўртасидаги дўстона муносабатларни сақлаб қолиш учун уларни Покистонга топширишларини сўраймиз, — деган Исломобод ҳукуматининг ички ишлар вазири.
Исломободдаги расмийларга кўра, Покистон “Толибон” билан бу масалани муҳокама қилган. Улардан бу гуруҳга қарши чора кўришни сўраган. Аммо “Толибон” ҳозирча ижобий жавоб қайтармаган.
Покистон чегара ҳудудларда хавф кучайганини билдирган. “Толибон” чегара назоратини яхши ташкил эта олмаганидан фойдаланган радикал гуруҳлар Покистонга таҳдид келтираётгани таъкидланган.
Афғонистондаги айрим маҳаллий манбаларига қараганда, Покистон даъво қилаётган “Таҳрики Толибон” аъзолари “Толибон” томонидан ҳибсга олинган. Кобул террорчилар томонидан Покистонда, Хайбер Пахтунхвада содир этилган, 5 нафар Хитой фуқароси ўлимига олиб келган терактни қоралашини яна бир бор таъкидлаган.
Изоҳ (0)