Афғонистоннинг Ғор вилоятида 17 май куни юз берган сув тошқинлари оқибатида камида 50 нафар маҳаллий аҳоли вакиллари ҳалок бўлган. Бу ҳақда Etilaatroz нашри хабар берди.
“Толибон” расмийлари вилоятдаги сув тошқини камида 50 кишининг ҳаётига зомин бўлгани ва катта молиявий йўқотишларга сабаб бўлганини маълум қилишган. Маҳаллий ҳокимият вакиллари қурбонлар сони ошиши мумкинлигини билдирган.
Фарёб вилоятида ҳам сув тошқини кузатилган. Ушбу вилоятнинг бешта туманида тошқин оқибатида 18 киши ҳалок бўлган. Икки нафар фуқаро жароҳатлангани хабар берилган.
Маълумотларга кўра, Афғонистонда жума куни юз берган тошқинлар оқибатида 2000 тага яқин уй бутунлай вайрон бўлган. 4000 дан ортиқ хонадон қисман зарарланган.
“Юзлаб гектар қишлоқ хўжалиги ерлари, юзлаб кўприклар, сув ўтказгичлар, тўғонлар, юз минглаб ҳосилдор дарахтлар вайрон бўлган. Минглаб қорамоллар нобуд бўлган”, — дейилади “Толибон” расмийлари хабарида.
Маҳаллий нашрлар Афғонистон шимолидаги кўплаб ҳудудлар, жумладан, Ғор, Бадахшон, Бағлон ва Ҳирот вилоятлари кучли сув тошқини туфайли зарарланганини ёзган. Тошқин оқибатида йўқотишлар кўлами аниқланаётгани билдирилган.
Изоҳ (0)