Фарғона вилоятида бола ўғрилари аниқлангани тўғрисида хабарлар тарқалди. Вилоят ИИБ ушбу хабарлар асоссиз ва ҳақиқатдан йироқ эканини маълум қилди.
Ижтимоий тармоқларда ёш бола машина юкхонасига солиниб, ҳаракатлантирилгани акс этган видео ҳам тарқалганди. Мазкур видео бўйича ҳам ўрганиш ишлари олиб борилди.
Маълум бўлишича, 14 май куни Қўқон шаҳар Ободюрт кўчасида яшовчи вояга етмаган бола М.М. ушбу маҳаллада турар жойга эга бўлган қўшниси М.А.га тегишли уйнинг девор ва ойнасига тош отиб синдирган. Буни кўрган М.А. болани қўрқитиб қўйиш мақсадида ўзига тегишли Nexia-2 юкхонасига солиб автомашинани ҳаракатлантирган.
Шу пайтда боланинг онаси B.Т. кўчага чиқиб, машинани тўхтатиб, фарзандини машинадан тушириб олган ҳамда ўртада ўзаро жанжал келиб чиққан.
Мазкур ҳолат юзасидан фуқаро М.А.га нисбатан Маъмурий жавобгарлик тўғрисидаги кодекснинг 183-моддаси тартибида ҳужжатлар расмийлаштирилиб, тегишли суд органига юбориш чораси кўрилган.
“Фуқаролардан ваҳима ва саросимага тушмасликларини ҳамда ишончсиз, текширилмаган маълумотларни тарқатмасликларини сўраймиз”, — дейилади ИИБ хабарида.
Бундана аввал Сурхондарёда тожикистонлик бола ўғрилари ушлангани ҳақидаги хабарлар рад этилганди.
Изоҳ (0)