Quyidagi simptomlarni sezsangiz, darhol shifokorga murojaat qiling.
Ko‘krak atrofidagi teri o‘zgarishi
Bu ko‘pincha saraton emas, sut bezlari shishi bo‘lishi mumkin. Shunga qaramay, agar shu yoki boshqa alomatlarni sezsangiz, tekshiruvdan o‘ting. Simptomlarning sababini aniqlash uchun shifokor qo‘shimcha tekshiruv (mammografiya yoki ultratovush) tayinlaydi. Ba’zan biopsiya (tekshirish uchun to‘qimalarning kichik qismini olish) talab qilinishi mumkin.
Xollarning paydo bo‘lishi
Agar xol hajmi, shakli, rangi o‘zgargan bo‘lsa yoki yangi xol paydo bo‘lsa, darhol shifokoringizga murojaat qiling. Bu saraton kasalligining umumiy belgisidir — to‘liq tekshiruvdan o‘tishingiz kerak.
Siydik va axlatda qon kelishi
Agar bu alomatni bir necha kundan ortiq kuzatsangiz, shifokorga murojaat qiling. Ko‘pincha qonli axlat gemorroy belgisi, ammo yo‘g‘on ichak saratoni ham bunga sabab bo‘lishi mumkin. Siydik yo‘li orqali qon kelishi ham odatda siydik pufagi va buyrak saratonining birinchi belgisidir. Ammo vahima qilishga shoshilmang, bu siydik pufagining yallig‘lanishi — sistit bo‘lishi ham mumkin.
Limfa tugunlarining o‘zgarishi
Limfa tugunlari kichik, dumaloq yoki loviya shaklidagi tuzilmalardir. Limfa turli organlardan kelib, ular orqali oqadi. Ular odatda yuqumli kasalliklar paytida ko‘payadi. Ammo saratonning ayrim turlarida, masalan, leykemiya va limfomada shishadi va noziklashadi. Agar shish bir oyda ham ketmasa, shifokorga murojaat qiling.
Yutish qiyinlashishi
Bu ba’zida bo‘lsa, xavotirlanishga hojat yo‘q. Ammo tez-tez sodir bo‘lsa va qusish yoki vazn yo‘qotish bilan birga kelsa, tomoq, qizilo‘ngach va oshqozon saratoni uchun tekshiruvdan o‘tish kerak.
Bunday holda, endoskopiya (shlang yutish), bo‘yin, ko‘krak va qorin kompyuter tomografiyasi buyuriladi. Bariy suspenziyasi yordamida rentgen tekshiruvi buyurilishi mumkin: bemor maxsus suyuqlik ichadi va rentgenogrammada qizilo‘ngach va oshqozon tekshiriladi.
Vazn yo‘qotish
Agar diyeta va mashg‘ulot rejimini o‘zgartirmagan bo‘lsangiz, sababsiz vazn yo‘qotish tanadagi muammolarni ko‘rsatadi, ayniqsa, 5 kilodan ortiq ozgan bo‘lsangiz.
Biroq buning sabablari stress yoki qalqonsimon bez kasalliklari bo‘lishi ham mumkin. Ammo saraton kasalligini istisno qilib bo‘lmaydi: oshqozon osti bezi, yo‘g‘on ichak, oshqozon yoki o‘pka saratonida ham sababsiz vazn yo‘qotiladi.
Jig‘ildon qaynashi
Ko‘pincha bu ortiqcha ovqatlanish, spirtli ichimliklarni haddan tashqari iste’mol qilish yoki stress tufayli yuzaga keladi. Bunday paytda ratsioningizni o‘zgartiring va bir-ikki hafta kuting. Agar jig‘ildon qaynashi ketmasa, shifokor bilan maslahatlashing.
Tez-tez, uzoq davom etadigan jig‘ildon qaynashi oshqozon va qizilo‘ngach saratoni alomati bo‘lishi mumkin. Jig‘ildon qaynashi saraton kasalligidan kelib chiqmasa ham oshqozon kislotasining to‘planishi qizilo‘ngachning shilliq qavatiga zarar yetkazadi.
Og‘izda dog‘lar paydo bo‘lishi
Og‘iz va lablaringizda sariq, kulrang, oq yoki yorqin qizil dog‘ bor-yo‘qligini tekshiring. Bularning barchasi og‘iz saratoni haqida signal berishi mumkin. Tekshiruvdan o‘tish uchun tish shifokori bilan bog‘laning.
Yuqori harorat
Uzoq vaqt davom etadigan yuqori harorat leykemiya haqida signal berishi mumkin. Shifokorga borishni kechiktirmang.
Charchoq
Albatta, bu holat ko‘pincha ishdagi stress yoki doimiy harakat bilan izohlanadi. Ammo uzoq vaqt shunday davom etsa, bu normal holat emas.
Agar horg‘inlik dam olishdan keyin ham o‘tib ketmasa yoki boshqa alomatlar, masalan, qonli axlat bilan birga kelsa, shifokorga, birinchi navbatda endokrinologga murojaat qiling.
Yo‘tal
Yo‘tal odatda uch-to‘rt haftadan keyin o‘z-o‘zidan ketadi. Agar u uzoqroq davom etsa, shifokorga borishni kechiktirmang. Ayniqsa, nafas qisilishidan aziyat cheksangiz. Agar yo‘talganingizda qon kelsa, darhol kasalxonaga boring.
Depressiya
Depressiya va saratonning ayrim turlari, masalan, oshqozon osti bezi saratoni o‘rtasidagi bog‘liqlikni ko‘rsatadigan tadqiqotlar mavjud. Bundan tashqari, ba’zi hollarda depressiya belgilari tashxis qo‘yishdan avval yoki boshqa belgilardan oldin paydo bo‘ladi. Bu juda kamdan kam hollarda sodir bo‘ladi, shuning uchun darhol vahimaga tushmang. Bunda imkon qadar tezroq tekshiruvdan o‘tish kerak.
Izoh (0)