Исроил бош вазири Биньямин Нетаньяху Рафаҳдаги ҳарбий операциядан иккита асосий мақсад — гаровга олинган исроилликларни қайтариш ва ҲАМАС ҳаракатини йўқ қилиш кўзланганини айтди.
Нетаньяху ҲАМАСнинг ўт очишни тўхтатиш таклифини рад этиб, Рафаҳдаги операция давом этишини таъкидлади.
“Биз аввалги гаровга олинганларни озод қилиш жараёнида ҳам исботлаб берган эдикки, уларнинг қайтиши учун ҲАМАСга фақат ҳарбий босим ўтказиш зарур”, — деди Нетаньяху.
У Рафаҳ назорат-ўтказиш пунктининг назорати “ҲАМАСнинг ҳарбий ва бошқарув салоҳиятига путур етказишда жуда муҳим қадам” эканини айтди. Нетаньяху Исроил аскарларига “вазифани аъло даражада бажаргани” учун миннатдорлик билдирди ва сўнгги кунларда ҳалок бўлганларнинг оилаларига ҳамдардлик билдирди.
Исроил бош вазири, шунингдек, ҲАМАСнинг ўт очишни тўхтатиш таклифига рози бўлишини “Рафаҳдаги ҳарбий операцияни бузишга уриниш” деб ҳисоблади. У ҲАМАС талаблари ва яҳудий давлатининг мақсадлари ўртасида кескин тафовут борлигини билдирди.
“Исроил фуқароларимиз хавфсизлиги ва давлатимиз келажагига таҳдид соладиган таклифни қабул қила олмайди”, — деди Нетаньяху.
У Қоҳирада бўлиб ўтган тинчлик музокараларида Исроил делегациясига гаровга олинганларни озод қилиш ва мамлакат хавфсизлигини таъминлаш учун зарур шарт-шароитларни талаб қилишни буюрди.
Исроилнинг Рафаҳдаги амалиёти
6 май куни Исроил армияси Ғазо секторининг жанубидаги Рафаҳнинг шарқий ҳудудларида ҳарбий амалиётлар бошлади. У ерда яшаган бир ярим миллионга яқин фаластинлик Ғазонинг шимолий ва марказий қисмига қочишга мажбур бўлди.
Исроил бош вазири идораси гаровга олинганларни озод қилиш масаласида ҲАМАСга босим ўтказиш учун Рафаҳдаги амалиётни давом эттиришга бир овоздан қарор қилган. Бундан ташқари, Исроил ҳарбийлари Ғазога гуманитар ёрдам етказилишига имкон берувчи — Рафаҳ ва Керем Шалом назорат-ўтказиш пунктининг Фаластин қисмини эгаллаб олган.
Изоҳ (0)