Ғарб қўшинларини Украинага юбориш Учинчи жаҳон уруши бошланишига олиб келиши мумкин. Бу ҳақда Венгрия ташқи ишлар вазири Петер Сийяртога таяниб, “Коммерсант” хабар берди.
Вазирнинг сўзларига кўра, Украинадаги ҳарбий конфликтни ҳал қилиш учун ўт очишни тўхтатиб, музокаралар бошлаш керак. Агар Европа ёки Америка аскарлари Украина ҳудудига қадам босса, бу “қизил чизиқдан ўтишни” англатади.
“Агар НАТОга аъзо давлат Украинага ҳарбийларини юборса, бу НАТО ва Россия ўртасида тўғридан-тўғри қарама-қаршилик бўлишини англатади, гап Учинчи жаҳон уруши ҳақида кетмоқда”, — дейди Сийярто.
Шунингдек, у давлатлардан бири ядро қуролидан фойдаланиши эҳтимоли ҳақидаги баёнотлардан хавотирда.
“У ёки бу томон ядро қуролидан фойдаланишга қарор қилса, бу сайёрамизнинг охири бўлишини жуда яхши биламиз”, — дея таъкидлади Венгрия ташқи ишлар вазири.
Эслатиб ўтамиз, февраль ойи охирида Франция президенти Эммануэл Макрон Украинага Ғарб қўшинларини юборишни истисно этмади, бироқ бир неча кундан сўнг у ҳали буни амалга ошириш ниятида эмаслигини айтди.
Апрель ойи бошида НАТО бош котиби Йенс Столтенберг альянс Украинага жанговар бўлинмаларни юборишни режалаштирмаётганини билдирди. Кремль Франциянинг Украинага қўшин юбориши “тузатиб бўлмайдиган оқибатларга олиб келиши”дан огоҳлантирди.
Изоҳ (0)