Қашқадарё вилоятида ноқонуний равишда спиртли ичимлик ишлаб чиқарган яширин цех аниқланди. Бу ҳақда ИИВ Тезкор-қидирув департаменти хабар берди.
Маълум қилинишича, 1990 йилда туғилган бир нафар ва 1997 йилда туғилган икки нафар шахс ўзаро тил бириктириб, қўлбола ароқ ишлаб чиқариш мақсадида яширин цех ташкил қилган.
Тезкор тадбир давомида мазкур цехдан жами 680 литр келиб чиқиши номаълум бўлган спирт, 4624 дона ароқ маҳсулотлари, икки дона станок, газ баллони, ёрлиқлар, шиша идиш ва қоғоз қутилар ашёвий далил сифатида расмийлаштирилиб, саломатлик учун хавфли бўлган маҳсулотларнинг истеъмолга чиқиб кетишининг олди олинди.
Мазкур ҳолат юзасидан Жиноят кодексининг 176-моддаси 2-қисми “в” банди (қалбаки пул, акциз маркаси ёки қимматли қоғозлар ясаш, уларни ўтказиш бир гуруҳ шахслар томонидан олдиндан тил бириктириб содир этилган бўлса) ҳамда 1861-моддаси 3-қисми “б” банди (этил спирти, алкоголли маҳсулот ва тамаки маҳсулотини қонунга хилоф равишда муомалага киритиш ёки ишлаб чиқариш) билан жиноят иши қўзғатилиб, тергов ҳаракатлари олиб борилмоқда.
Изоҳ (0)