“Манчестер Сити” ярим ҳимоячиси Фил Фоден жамоадоши Кевин де Брюйнени Англия Премьер Лигасининг энг яхши футболчиси деб топди.
“Менимча, Кевин Премьер Лигадаги энг яхши футболчи ҳисобланади. У билан бирга ўйнаш жуда ёқимли ва бундай имконият кўп бўлишига умид қиламан”, — деб Фил Фоден сўзларини келтирмоқда Sky Sports.
Эслатиб ўтамиз, Фоден “Манчестер Сити” тарбияланувчиси ҳисобланади. Жорий мавсумда Фоден барча мусобақаларда 48 та учрашувда қатнашиб, 24 та гол ва 10 та голли узатмани амалга оширди. Футболчининг клуб билан амалдаги меҳнат шартномаси 2027 йилнинг ёзига қадар тузилган.
Фил Фоден “Брайтон” билан бўлган “Манчестер Сити”нинг сўнгги ўйинида дубль қайд этиб, жамоасининг йирик ҳисобда (0:4) ғалабасига ҳисса қўшди.
Transfermarkt порталида берилган маълумотларга кўра, футболчининг бозор қиймати 130 миллион еврони ташкил қилади.
“Манчестер Сити” жамоаси 33 ўйиндан кейин АПЛда 2-ўринда бормоқда. Жамоа 77 очко билан биринчи ўринда турган “Арсенал” клубидан бир очко кам тўплаган.
Изоҳ (0)