Замонавий дунёда кўпчилик ўзгаришларга эҳтиёж сезади, аммо уларга қатъий ҳаракат қилиш учун мотивация етишмаслиги мумкин. Бундай пайтларда ҳаётингизни яхши томонга ўзгартиришга илҳомлантирадиган фильмлар ёрдамга келади.
“Стажёр”
“Стажёр”да нафақага чиқишни истамайдиган 70 ёшли ёлғиз қария Бен Уиттакер ҳақида ҳикоя қилинади. Қария ёш ва истиқболли тадбиркор аёл Жюль Остин раҳбарлигидаги онлайн мода дўконида амалиёт дастурига ариза топширади. Гарчи дастлаб ҳамма кекса ходимга бир оз шубҳа билан қараган бўлса-да, донолиги ва меҳрибонлиги туфайли ҳамкасблари уни яхши кўриб қолади.
Шундай қилиб, Бен ва Жюль ишдаги, шунингдек, шахсий ҳаётдаги қийинчиликларни биргаликда енгиб, бир-биридан қимматли сабоқ олади.
“Ҳаёт пульти”
Бу фильм томошабинларга ҳаёт лаҳзаларидан завқланиш муҳимлигини эслатади, чунки шошқалоқлик ҳақиқатан ҳам муҳим нарсаларни ўтказиб юборишга олиб келиши мумкин.
Майк Ньюман муваффақиятли архитектор, у ҳавас қиларлик карьерага эга. Бош қаҳрамоннинг меҳрибон оиласи бўлса-да, иши туфайли улар билан жуда кам вақт ўтказади.
Кунларнинг бирида Майк ҳаётини бошқариш имконини берувчи пультга эга бўлади: у ўзи учун муҳим бўлмаган лаҳзаларни ўтказиб юбориши, уларни кино каби орқага қайтариши мумкин. Эркак дастлаб бундай имкониятдан хурсанд бўлади. Бироқ кейинчалик бу нарса унга жуда қимматга тушишини англаб етади.
“Бахт изидан”
1980 йиллар бошларида содир бўлган реал воқеа мазкур фильм учун асос бўлган. Крис Гарнер савдо компаниясида амалиёт ўташ орқали бахтсиз ҳаётини ўзгартиришга қарор қилади.
Кўп қийинчиликларга қарамай Гарнер таваккал қилади. Хотини уни ёш боласи билан ташлаб кетса-да, у орзусига қатъият билан эришади. Қашшоқлик, бошпанасизлик, ҳатто қамоқхонадаги қийинчиликларни енгиб ўтиб, олдига қўйган мақсадларига эришади.
“Фақат “ҳа” де”
Фильмда ўзини ривожлантиришга ҳаракат қилаётган банк ходими Карлнинг ўзгариши ҳақида ҳикоя қилинади.
Дўстидан ўрнак олган ҳолда Карл ҳаётий энергиясини оширишга қаратилган психологик тренингга ёзилади. Айнан шу воқеа тўсатдан бурилиш нуқтасига айланади, чунки у янги одатга ўрганади — у ҳар қандай имкониятга “ҳа” дейишни бошлайди.
“Бошидан бошла”
“Бошидан бошла” фильми муаллифлари ҳатто фильм номида ҳам томошабинларни ўзига ишонишга ундайди. Женнифер Лопес ўйнаган бош қаҳрамон Майяни кутилмаган ўзгаришлар кутмоқда. Ушбу фильм сизни кулдиради, йиғлатади, шунингдек, ўзгариш учун сабр-тоқатли ва қатъиятли бўлишга ундайди.
Сюжетга кўра, ҳаёти муваффақиятсизликлар ва синган орзуларга тўла Майянинг тақдири кутилмаганда ўзгаради. Аёл таниқли корпорацияда нуфузли иш учун эълон қилинган суҳбатдан муваффақиятли ўтади. Бу унга ижодкорлик ва меҳнатсеварлик дипломдан қимматроқ эканини исботлаш имконини беради.
Изоҳ (0)