Россия амалдорларнинг хорижга чиқишига чекловларни кучайтирмоқда

Россия ҳукумати хорижий кучлар давлат сирларига киришга уринишидан хавотирланиб, давлат хизматчиларининг чет элга чиқиш қоидаларини кучайтирмоқда. Бу ҳақда Reuters вазиятдан хабардор тўққизта манбага таяниб хабар берди.

Агентлик суҳбатдошларига кўра, аксар амалдорларга ҳатто Россияга қарши санкцияларга қўшилмаган дўст давлатларга ҳам бориш тақиқланган.

Умуман олганда, сиз ҳеч қаерга боролмайсиз, ҳаттоки Ўзбекистон ёки Беларусга май ойидаги байрамларда ҳам рухсатингиз бўлсагина боришингиз мумкин, — дейди манбалардан бири.

Манбага кўра, Федерал хавфсизлик хизмати (ФХХ) россиялик амалдорлар чет элга саёҳат қилиш чоғида “тузоққа тушиб қолишлари ва миллий хавфсизликка таъсир этувчи сирларни ошкор қилишга мажбур бўлишларидан хавотирда.

ФХХ, шунингдек, амалдорлар ҳибсга олиниши ва кейин Ғарбга экстрадиция қилиниши ёки “сирларни ошкор қилиш” билан боғлиқ келишув таклиф қилиниши мумкинлигига ишонади. Улар январь ойида аннексия қилинган Севастополнинг собиқ губернатори Дмитрий Овсянников Лондонда ҳибсга олинганидан кейин тартибни кучайтиришга қарор қилишган.

ФХХ талабига биноан, ҳукумат айрим бўлимлар ходимларига махсус рухсатсиз мамлакатдан чиқиб кетишни тақиқлаган. Қоидалар хавфсизликни расмийлаштириш даражасига қараб фарқланади. Россия парламентидаги манбага кўра, қуйи палата ходимларига хорижга ҳар қандай сафар тақиқланган.