Нью-Йоркда жойлашган Журналистларни ҳимоя қилиш қўмитаси “Толибон”нинг Афғонистонда Facebook ижтимоий тармоғини чеклаш ёки блоклаш режасидан хавотир билдирди ва ҳаракатдан эркин маълумотга тўсқинлик қилувчи чораларни кўришни тўхтатишни сўради.
Яқинда “Толибон” алоқа ва ахборот технологиялари вазири вазифасини бажарувчи Нажибуллоҳ Ҳаққоний ТОLOnews телеканалига берган интервьюсида ҳаракат Афғонистонда Facebook’ка киришни чеклаш ёки бутунлай блоклашни режалаштирилаётганини айтганди.
Журналистларни ҳимоя қилиш қўмитаси ўз баёнотида “Толибон” ҳокимиятни қўлга киритганидан сўнг журналистларни ҳибсга олгани, афғон хабарлари веб-сайтларини ёпиб қўйгани ва хорижий оммавий ахборот воситаларига киришни чеклагани, бироқ бу оммавий ахборот воситаларининг Facebook саҳифаларига кириш имкони сақланиб қолганини айтди.
“Толибон”нинг Facebook’ка киришни чеклаш ёки блоклаш режаси Афғонистондаги ахборот эркинлигига навбатдаги зарба бўлади”, — деди Осиёдаги Журналистларни ҳимоя қилиш қўмитаси координатори Беҳ Ли Йи.
Унинг сўзларига кўра, ижтимоий тармоқ платформалари, жумладан, Facebook ҳам Афғонистонда медиа саноатининг таназзулга учраши ва матбуот эркинлигининг бўғилиши оқибатида юзага келган бўшлиқни тўлдиришга ёрдам берди.
Ли Йининг айтишича, Facebook тармоғини тақиқлаш “Толибон” томонидан цензура кучайтирилганини кўрсатади.
Facebook Афғонистондаги янгиликлар ва маълумотларни тарқатиш учун оммавий ахборот воситалари томонидан кенг қўлланиладиган энг машҳур ижтимоий тармоқлардан биридир.
“Толибон” матбуот котиби Забиҳуллоҳ Мужоҳид Журналистларни ҳимоя қилиш қўмитасига Facebook тақиқланмаслигини, лекин унга нисбатан чекловлар қўлланилишини айтди.
Изоҳ (0)