“Очиқ бюджет” порталида “Ташаббусли бюджет” жараёнининг 2024 йилдаги 1-мавсуми ғолиб лойиҳалари эълон қилинган эди. Қашқадарё вилояти ҳокимлигининг маълум қилишича, вилоят мамлакат бўйлаб энг кўп овоз тўпланган ҳудуд бўлди.
Айтилишича, 2024 йил ташаббусли бюджет лойиҳаси 1-мавсумида Яккабоғ тумани “Қўшчинор” маҳалласи 14 918 та овоз билан республикада биринчи бўлди. Шунингдек, республика бўйлаб рекорд даражадаги энг кўп овоз тўпланган ҳудуд — Қашқадарё, жами 1 562,3 мингта (44 фоиз) овоз тўпланди.
Қашқадарё вилоятига 1-мавсумда 253 млрд сўм маблағ ажратилди, 2188 та лойиҳалар саралаб олинди, 152 та маҳалла бўйича 183 та лойиҳа ғолиб бўлди.
Ўқитувчи ва ҳамширалар мажбурланди, ҳатто руҳий беморлардан овоз йиғилди: галдаги “Ташаббусли бюджет” нимаси билан ёдда қолди?
“Ташаббусли бюджет”нинг 2024 йилдаги биринчи мавсуми учун овоз бериш 16 март куни соат 00:00 дан бошланган бўлиб, жараён 4 апрель куни соат 00:00 да якунланди. Навбатдаги овоз йиғиш жараёнлари ўқитувчи ва ҳамшираларнинг овоз тўплашга мажбурланиши, соврин учун Gentra, Nexia каби автомобиллар, ўнлаб қўзи ваъда қилиниши билан ёдда қолди.
Республика бўйлаб 2 254 та маҳалла бўйича жами 2 770 та лойиҳа ғолиб деб топилди. Ушбу лойиҳаларни молиялаштириш учун маҳаллий бюджет маблағлари ҳисобидан 3,3 трлн сўм йўналтирилади.
Маълумот учун, овоз бериш жараёнларида мамлакат бўйлаб 11,7 миллион нафар фуқаро иштирок этди.
Шу билан бирга, Қизилтепа туманида фуқаролар мажбурий овоз тўплашга жалб этилиши ҳолати қайд этилгани сабабли мажбурий овоз тўпланган лойиҳаларга аниқлик киритилмоқда, ўрганиш натижаларига кўра, мазкур туман бўйича ғолиб лойиҳалар қўшимча равишда эълон қилинади.
Ғолиб лойиҳалар билан ушбу ҳавола орқали танишиш мумкин.
Изоҳ (0)