Наманган вилоятида ўзганинг буйрагини ноқонуний йўллар билан пул эвазига кўчириб беришни ваъда қилган шахс қўлга олинди. Бу ҳақда вилоят ИИБ ахборот хизмати хабар берди.
Қайд этилишича, Наманган вилояти Косонсой туманида яшовчи шахс инсон аъзолари ёки тўқималарини олди-сотди қилиш мақсадида Андижон вилояти Булоқбоши туманида яшовчи фуқаро билан унинг бир томон буйрагини 4 минг доллар эвазига Тожикистонга олиб бориб, жарроҳлик йўли билан кўчириб ўтказиб беришга келишган.
Фуқарони қалбаки туғилганлик тўғрисидаги гувоҳнома ва ҳужжатлар билан Тошкент шаҳрига олиб кетаётган вақтида Наманган вилояти ҳуқуқни муҳофаза қилиш органи ходимлари томонидан ушланган.
Холислар гувоҳлигида жарроҳлик амалиётини ўтказиш учун расмийлаштирилган барча ҳужжатлар баённома асосида олинган.
Ҳолат юзасидан Поп тумани ИИБ Тергов бўлинмаси томонидан Жиноят кодексининг 133-1- (инсон аъзоларининг ва (ёки) тўқималарининг олди-сотдиси) ҳамда 228-моддалари (ҳужжатлар, штамплар, муҳрлар, бланкалар тайёрлаш, уларни қалбакилаштириш, сотиш ёки улардан фойдаланиш) билан жиноят иши қўзғатилган. Ҳозирда дастлабки тергов ҳаракатлари олиб борилмоқда.
2023 йилда Соғлиқни сақлаш вазирлиги Ўзбекистонда турли ёшдаги болаларда 50 га яқин буйрак кўчириб ўтказиш амалиёти бажарилганини маълум қилганди. 2017-2023 йилларда 1 минг 100 та буйрак трансплантацияси ва 70 дан ортиқ жигар трансплантацияси амалга оширилган.