АҚШ собиқ президенти Дональд Трампнинг Truth Social номли ижтимоий тармоғига эгалик қилувчи Trump Меdia & Technology компаниясининг биржадаги қиймати савдонинг биринчи кунида бир ярим баравар ошиб, саккиз миллиард долларга етди. Бу ҳақда Reuters хабар берди.
Трампнинг компаниядаги улуши (58 фоиз) 4,6 миллиард долларга баҳоланмоқда. NASDAQ биржасидаги савдоларнинг биринчи кунида компания нархи ҳар бир акция учун 49,95 доллардан 79,38 долларгача кўтарилди, ёпилишда эса 57,99 долларни ташкил этди. Савдо шунчалик ўзгарувчан эдики, у бир неча дақиқага тўхтатилди, — деб таъкидлади Financial Times.
Аниқланишича, келишувга кўра, Трампга олти ой давомида ўз улушини сотишга рухсат берилмаган. 2021 йил 6 январда Вашингтондаги Капитолийга ҳужумдан сўнг Трамп ижтимоий тармоқларга кириши чекланган ва у йирик технология компаниялари “зулми”га қарши ўз платформасини яратишини эълон қилган. Трамп Truth Social’ни Facebook, Twitter ва YouTube’га муқобил деб ҳисоблаган.
Компаниянинг фонд биржасига киритилиши 22 март куни АҚШ Қимматли қоғозлар ва биржа комиссиясидан рухсат олгач, акциядорлар томонидан тасдиқланган.
Изоҳ (0)