Журналист Рюдигерни террористик ишорани кўрсатишда айблади. Футболчи судга мурожаат қилди

Рюдигер ижтимоий тармоқдаги пости учун журналист билан судлашади. Бензема билан ҳам худди шундай муаммо рўй берган эди.

Антонио нимада айбланмоқда?

“Реал Мадрид” ҳимоячиси Антонио Рюдигер яқинда анъанавий араб либосида суратга тушиб, Рамазон ойи бошланиши ҳақида изоҳ қолдирди. Журналист Юлиан Рейхелт бу ишорага салбий жавоб берди. Бунинг учун Антонио журналистни судга берди ва бу ҳаракат Германия футбол иттифоқи томонидан қўллаб-қувватланди.

Ўша суратда Рюдигер оқ либосда бўлган. Унинг кўрсаткич бармоғи юқорига кўтарилган бўлган. Постда футболчи шундай деган:

Рамазон ойи бутун дунё мусулмонларига муборак бўлсин. Аллоҳ таоло тутган рўзаларимизни, қилган дуоларимизни қабул қилсин. 

Журналист Юлиан Рейхелт бу имо-ишорадан жаҳли чиқган ва Х (собиқ Twitter) ижтимоий тармоғига ғазаб билан пост жойлаган. Постда Юлиан Рюдигерни радикал исломчиларга ҳамдардликда айблади. Журналистга футболчининг кўрсаткич бармоғи юқорига кўтарилгани ёқмаган:

Антонио Рюдигернинг постида радикалликни кўрмайдиган ҳар бир кишига мурожаатим: Конституцияни ҳимоя қилиш федерал идораси бу ишорани “ИШИД бармоғи” деб атайди ва буни исломчиларнинг белгиси сифатида тушунади. Буни оқлаб бўлмайди, лекин негадир Германия футбол федерацияси бу борада жим.

Бунга жавобан Германия Ички ишлар вазирлиги ҳам тушунтириш берди:

“Бу имо-ишора эътиқодга мансубликнинг таърифи сифатида тушунилади ва шунинг учун жамоат тартибига нисбатан ҳеч қандай муаммо хавфи деб қаралмайди. Айрим радикал исломий гуруҳларнинг бу белгидан нотўғри фойдаланиши ҳеч нарсани ўзгартирмайди”, — дейилади Германия Ички ишлар вазирлигининг изоҳида.

Рейхелт ушбу айбловдан кейин кечирим сўрамади, балки ўз нуқтаи назарида туришини айтиб ўтди. У ижтимоий тармоқларда яна бир кенгроқ пост ёзди:

Бу имо-ишора террорчилар томонидан йигирма йил давомида қўлланилган. Бу, шубҳасиз, бутун дунё бўйлаб, шу жумладан Берлинда ҳам, ИШИД ва исломчи қотилларнинг, бутун сайёрага вайронагарчилик ва чексиз азоб-уқубатларни олиб келган одамларнинг белгисига айланган. 

Худди шундай вазиятга Карим Бензема ҳам тушди. У Франция ички ишлар вазири Жералд Дарманин томонидан террорчилик ташкилоти билан алоқадорликда айбланган. Бунга футболчининг ижтимоий тармоқлардаги Исроил—Фаластин можаросини қоралаган пости сабаб бўлган.

Бензема ҳам судга мурожаат қилиб, Дарманиннинг сўзларини туҳмат деб атаган. Суд натижаси ҳали аниқ эмас, жараён давом этмоқда.