Ryudiger ijtimoiy tarmoqdagi posti uchun jurnalist bilan sudlashadi. Benzema bilan ham xuddi shunday muammo ro‘y bergan edi.
Antonio nimada ayblanmoqda?
“Real Madrid” himoyachisi Antonio Ryudiger yaqinda an’anaviy arab libosida suratga tushib, Ramazon oyi boshlanishi haqida izoh qoldirdi. Jurnalist Yulian Reyxelt bu ishoraga salbiy javob berdi. Buning uchun Antonio jurnalistni sudga berdi va bu harakat Germaniya futbol ittifoqi tomonidan qo‘llab-quvvatlandi.
O‘sha suratda Ryudiger oq libosda bo‘lgan. Uning ko‘rsatkich barmog‘i yuqoriga ko‘tarilgan bo‘lgan. Postda futbolchi shunday degan:
Ramazon oyi butun dunyo musulmonlariga muborak bo'lsin. Alloh taolo tutgan ro‘zalarimizni, qilgan duolarimizni qabul qilsin.
Jurnalist Yulian Reyxelt bu imo-ishoradan jahli chiqgan va X (sobiq Twitter) ijtimoiy tarmog‘iga g‘azab bilan post joylagan. Postda Yulian Ryudigerni radikal islomchilarga hamdardlikda aybladi. Jurnalistga futbolchining ko‘rsatkich barmog‘i yuqoriga ko‘tarilgani yoqmagan:
Antonio Ryudigerning postida radikallikni ko‘rmaydigan har bir kishiga murojaatim: Konstitutsiyani himoya qilish federal idorasi bu ishorani “ISHID barmog'i” deb ataydi va buni islomchilarning belgisi sifatida tushunadi. Buni oqlab bo‘lmaydi, lekin negadir Germaniya futbol federatsiyasi bu borada jim.
Bunga javoban Germaniya Ichki ishlar vazirligi ham tushuntirish berdi:
“Bu imo-ishora e’tiqodga mansublikning ta’rifi sifatida tushuniladi va shuning uchun jamoat tartibiga nisbatan hech qanday muammo xavfi deb qaralmaydi. Ayrim radikal islomiy guruhlarning bu belgidan noto‘g‘ri foydalanishi hech narsani o‘zgartirmaydi”, — deyiladi Germaniya Ichki ishlar vazirligining izohida.
Reyxelt ushbu ayblovdan keyin kechirim so‘ramadi, balki o‘z nuqtai nazarida turishini aytib o‘tdi. U ijtimoiy tarmoqlarda yana bir kengroq post yozdi:
Bu imo-ishora terrorchilar tomonidan yigirma yil davomida qo‘llanilgan. Bu, shubhasiz, butun dunyo bo‘ylab, shu jumladan Berlinda ham, ISHID va islomchi qotillarning, butun sayyoraga vayronagarchilik va cheksiz azob-uqubatlarni olib kelgan odamlarning belgisiga aylangan.
Xuddi shunday vaziyatga Karim Benzema ham tushdi. U Fransiya ichki ishlar vaziri Jerald Darmanin tomonidan terrorchilik tashkiloti bilan aloqadorlikda ayblangan. Bunga futbolchining ijtimoiy tarmoqlardagi Isroil—Falastin mojarosini qoralagan posti sabab bo‘lgan.
Benzema ham sudga murojaat qilib, Darmaninning so‘zlarini tuhmat deb atagan. Sud natijasi hali aniq emas, jarayon davom etmoqda.
Izoh (0)