Тошкент вилоятида 7 ёшли қизча ўз аммаси томонидан уриб ўлдирилгани ҳақида хабар берилганди. Ижтимоий ҳимоя миллий агентлиги Тошкент вилояти бошқармаси ҳолат юзасидан қўшимча маълумот берди.
Маълум қилинишича, вилоятнинг Бўка туманида яшовчи 1989 йилда туғилган аёл И.Н. 2023 йилнинг 22 ноябрида Бекобод туманида истиқомат қилувчи икки вояга етмаган жияни — 2011 йилда туғилган А.М. ва 2017 йилда туғилган А.Ч.нинг ота-онаси Россияга кетгани сабабли, ўзи тарбиялаб келаётган жиянларига нисбатан ўзини васий этиб тайинлашни сўраб, Бекобод тумани ҳокими номига ариза билан мурожаат қилган.
Бекобод тумани Тиббиёт бирлашмасига қарашли кўп тармоқли марказий поликлиникасининг тиббий кўрик хулосасига кўра, аёл ва унинг жиянлари жисмонан ва руҳан соғлом экани кўрсатилган. Юқоридаги хулосаларга асосан, И.Н. Бекобод тумани ҳокимининг 2023 йил 15 декабрида А.М. ва А.Ч.га нисбатан васий тайинлаш тўғрисидаги қарори қабул қилинган.
12 март куни соат 20:00 ларда Бўка тумани “Инсон” ижтимоий хизматлар марказига вояга етмаган А.Ч. аммаси И.Н. томонидан калтаклангани оқибатида шифохонага тушгани ҳақида хабар келиб тушган. Мазкур ҳолат бўйича Марказий шифохонага бориб ўрганилганда, А.Ч. жонлантириш бўлимида ётгани аниқланган. Тиббиёт ходимларининг олиб борган саъй-ҳаракатларига қарамай, у 15 март куни вафот этган.
Ҳолат юзасидан 12 март куни Бўка тумани ИИБ ҳузуридаги тергов бўлинмаси томонидан Жиноят кодексининг 104-моддаси (қасддан баданга оғир шикаст етказиш) билан жиноят иши қўзғатилган. Аёлга нисбатан қамоққа олиш тарзидаги эҳтиёт чораси қўлланган.
Изоҳ (0)