Март ойи охиригача Европа Иттифоқи Украинага 500 мингта ўқ-дориларни жўнатади, 2024 йил охиригача эса уларнинг сони 1 миллионга етади, деди брифинг чоғида Еврокомиссия ташқи сиёсат хизмати вакили Питер Стано.
2023 йил март ойида Европа дипломатияси раҳбари Жозеп Боррел бир йил ичида Украинага 1 миллион снаряд етказиб беришга ваъда берган эди.
“Кеча бу мавзу ташқи ишлар вазирларининг учрашувида муҳокама қилинди. Сиёсий мақсад ҳамон ўз кучида қолмоқда, йил охиригача 1 миллион снаряд етказиб берамиз, ҳозиргача, тўғрироғи, март ойининг охиригача эса 500 мингга яқин снаряд етказиб берамиз”, — деди у.
Стано январь ойида бўлиб ўтган брифингда 2024 йил мартигача 1 миллион ўқ-дори етказиб бериш ваъдасини бажариш қийин эканини айтганди. Кейин у Европа Иттифоқи йиллик ишлаб чиқаришни 1 миллион донагача оширишни режалаштираётганини ҳам айтди. Бироқ Стано Жозеп Боррелл ваъдасини ўзининг “сиёсий мақсади” деб атади ва Европа Иттифоқига аъзо давлатлар қўлидан келган барча ишни қилганини қўшимча қилди.
15 март куни Европа Иттифоқига аъзо мамлакатлар ўқ-дорилар ишлаб чиқаришни кўпайтириш учун 500 миллион евро ажратишни маъқуллади. Еврокомиссия бу чора-тадбирлар йиллик ўқ-дори ишлаб чиқаришни 2025 йилга бориб 2 миллион донага етказишини кутмоқда.
Изоҳ (0)