Shimoliy Koreya 18-mart kuni ertalab Yapon dengizi tomon ikkita ballistik raketa uchirdi, ularning ikkalasi ham Yaponiyaning eksklyuziv iqtisodiy zonasi tashqarisiga tushdi. Bu haqda Yaponiya Mudofaa vazirligiga tayanib, NHK telekanali xabar berdi.
Mudofaa vazirligi ma’lumotlariga ko‘ra, birinchi parvoz 07:46 (Toshkent vaqti bilan 03:46), ikkinchisi taxminan 40 daqiqadan so‘ng amalga oshirilgan. Ikkala raketa ham Yaponiyaning eksklyuziv iqtisodiy zonasidan tashqariga tushgan.
Yaponiya Mudofaa vazirligi axborotni tahlil qilish va vaziyatni kuzatishda davom etmoqda. Dengizdagi kemalarga hushyor bo‘lish va kelayotgan ma’lumotlarni kuzatish tavsiya etilgan.
Yaponiya hukumati Bosh vazir huzurida ma’lumot to‘plash va ehtimoliy zararni baholash uchun bo‘lim boshliqlari guruhini chaqirgan. Ayni paytda Yonhap agentligi Janubiy Koreya harbiylariga tayanib, Pxenyan qisqa masofaga uchuvchi bir nechta raketalarni uchirgani haqida xabar bermoqda. Ularning aniq soni ma’lum emas.
Janubiy Koreya Birlashgan shtab boshliqlari qisqa masofali ballistik raketalar Shimoliy Xvanxe provinsiyasidagi Sangvon shahridan mahalliy vaqt bilan ertalab soat 7:44 da uchirilganini aytgan.
Bizning armiyamiz qo‘shimcha parvozlarga tayyorgarlik ko‘rishda kuzatuv va hushyorlikni oshirdi. Shimoliy Koreya ballistik raketalarini uchirishga oid ma’lumotlarni AQSH va Yaponiya rasmiylari bilan bo‘lishish orqali biz to‘liq shaylikni saqlab qolamiz, — deya harbiylarning so‘zlaridan iqtibos keltirgan agentlik.
Ta’kidlanishicha, ballistik raketalar AQSH davlat kotibi Entoni Blinken Seulga kelgan kuni uchirilgan. Davlat departamenti rahbari 30 ga yaqin davlatdan yuqori darajadagi hukumat amaldorlari taklif etilgan sammitda ishtirok etish uchun Janubiy Koreyaga kelgan.
Izoh (0)