Сурхондарёда интернетда яроқсизлиги билан «машҳурликка» эришган ва 16,1 млрд сўмга тушган кўприк фойдаланишга топширилди

Сурхондарё вилоятининг Қумқўрғон туманида 6 миллиард 500 миллион сўмга қурилиб, 19 ой хизмат кўрсатган ва ижтимоий тармоқларда яроқсизлиги билан «машҳурликка» эришган кўприк фойдаланишга топширилди, дея хабар берди «Дарё» мухбири.

Вилоятнинг Қумқўрғон туманида бўлган «Дарё» мухбирининг хабар беришича, жами 16 миллиард 100 миллион сўм сарфланган кўприк 2021 йилнинг 1 апрелидан бошлаб фойдаланишга топширилган.

«Ҳозирча кўприк фойдаланишга топширилди. Камчиликлари бўлса, албатта, қурувчи томонидан бартараф этилади», — деди Қумқўрғон туман ҳокимлиги ахборот хизмати раҳбари Зоҳир Яҳёев.

Эслатиб ўтамиз, 2020 йилнинг сентябрь ойида «Дарё» мухбири билан суҳбатлашган «Кўганли» маҳалласида яшовчи Одина бобо Абдураҳимов кўприк янги қурилган бўлса-да, ҳеч қанча вақт ўтмай яроқсиз ҳолга келганини айтиб, «Мана шу кўприк 1 йил 7 ой деганда шундай авария ҳолатига келиб қолди. Ҳолбуки, бу кўприкка 6,5 миллиард сўм сарфланганди. Иш сифатсиз бажарилгани учун кўприкнинг ‘умри қисқа’ бўлди. Биз йўлимиз ҳам шундай сифатсиз таъмирланиб, ҳеч қанча вақт ўтмасдан яроқсиз ҳолга келишидан қўрқяпмиз», деганди.

Шундан сўнг Сурхондарё вилоят прокуратураси мазкур мақолага муносабат билдириб, прокуратура томонидан терговга қадар текширув ҳаракатлари бошланганини билдирди. Бироз вақтдан сўнг эса прокуратура кўприк қурган қурувчи ташкилот 6 миллиард 500 миллион сўмлик кўприкни қуришда 34 миллион 491 минг 265 сўмни «еб кетганини» фош қилди. Ўша пайтда воқеаларни ўрганган «Севимли» каналининг «Замон» информацион дастури журналистлари мазкур кўприк қурилишига яна 9 миллиард 600 миллион сўм маблағ ажратилганини очиқлади. Демак, ҳисоб-китобларга кўра, Қумқўрғондаги мазкур кўприк 16 миллиард 100 миллион сўмга тушди.