Qashqadaryo viloyatining Shahrisabz shahriga rahbarlik qilgan birinchi ayol rahbar Shodioy Mansurova vafot etdi. Bu haqda “Daryo”ga Murodjon Azimovning o‘rinbosari Komila Karomova xabar berdi.
-AkLYrgi3.jpg)
Komila Karomovaga ko‘ra, marhuma 7-mart kuni 78 yoshida yurak xurujidan olamdan o‘tgan.
2024-yilning 7-mart kuni Qashqadaryo xalqi uchun og‘ir yo‘qotish bo‘ldi. Viloyat xotin-qizlari orasida birinchilardan bo‘lib, shahar hokimi, viloyat xotin-qizlar qo‘mitasining raisi bo‘lib ishlagan “Mo‘tabar ayol” ko‘krak nishoni, “Salomatlik” ordeni sohibasi Shodioy Aslanovna Mansurova kutilmaganda, to‘satdan vafot etdi, — deydi Komila Karomova marhumani yodga olar ekan.
1995-yildan 1998-yilgacha Qashqadaryo viloyati hokimi sifatida faoliyat yuritgan Ozod Parmonovning “Daryo” jurnalistiga bildirishicha, marhuma 1988-yil Shahrisabz shahri va tumani qo‘shib yuborilgunga qadar shaharda partiya qo‘mitasi birinchi kotibi sifatida ish olib borgan.
8-mart tantanalariga qatnashish uchun Toshkentga kelgan edim. Opa dastlab qo‘ng‘iroq qilganlarida yaxshi yetib kelganimni so‘radi. So‘ngra viloyat tadbirining qachon o‘tishini, bir kungina qolsa ham nega taklifnomalar haligacha tarqatilmayotganidan bezovta bo‘lib, surishtirdilar. “Nega ro‘yxatni o‘zingiz qilmadingiz, axir viloyat ayollarini sizdan yaxshi biladigani ham bormi?”, deya meni koyidilar. “Opa har bir kotibiyatning o‘zi ro‘yxat qilyapti, taklifnomani sizga albatta yetkazishadi, Axir bayram qachon sizsiz o‘tgan dedim”, ko‘ngillarini ko‘tarib. Bu orada Nilufarga telefon qilib, taklifnomani opaga yetkazishini, shaxsan o‘zi kutib olishini tayinladim. Kech soat 23:00 larda yana qo‘ng‘iroq bo‘ldi. Opa taklifnomani olganini bildirdi.
Ertalab tantanaga kirar chog‘im, telefonni topshirishim kerak edi. Kechikmay borishlarini yodlariga solay deb opaga qo‘ng‘iroq qilsam Shahnoza kelin oldi. “Opangizni kardiologiyaga olib ketishdi”, — dedi tashvish bilan. Darrov viloyat sog‘liqni saqlash boshqarmasi rahbari Alisher Boboyevga telefon qildim. Ular bilan gaplashib, telefonni topshirar ekanman, ko‘nglim joyiga tushgandek bo‘ldi. Alisherjon hozir hammani oyoqqa turg‘azadi, nasib bo‘lsa yaxshi bo‘ladi, opa irodali osonlik bilan taslim bo‘lmaydi, yengadilar, degan ishonch o‘tdi ko‘nglimdan. Yonimda ketayotgan O‘zbekiston Qahramoni Muhabbat Sharopova ham fikrimni tasdiqladilar. Ammo, kechga yaqin, katta ko‘tarinki ruhda o‘tgan tadbirdan ruhimiz baland chiqar ekanmiz, opaning janozalari ham o‘qilganligini eshitdik. Opa yurak xurujidan dastlabki muolajaga ham ulgurmagan edilar, — deydi Qashqadaryo hokimi o‘rinbosari Komila Karomova marhumani yodga olar ekan.
Izoh (0)