Президент Хоразм вилоятини ижтимоий-иқтисодий ривожлантиришнинг муҳим вазифалари юзасидан бўлиб ўтаётган йиғилишда тадбиркорлар учун қатор имтиёзлар белгиланганини эълон қилди.
Жумладан, импорт ускуналар, эҳтиёт қисм ва хом ашё 5 йилга божхона тўловидан озод қилинади, қўшилган қиймат солиғини 180 кунга кечиктириб тўлашга рухсат берилади. Маҳаллийлаштириш лойиҳаларига олинган кредит фоизининг 10 фоиз банди қоплаб берилади, давлат мулки ва ер участкаларини хусусийлаштиришда 5 йил ичида бўлиб-бўлиб тўлаш имконияти яратилади.
Сотилган кўчмас мулк учун тўлов 3 ойда амалга оширилганда 25 фоиз чегирма берилади. Иқтисодий ва саноат зоналарида олган мажбуриятини бажарган тадбиркорлар ер ва бинони хусусийлаштириши мумкин бўлади. Экспортчиларга бошқа вилоятдан хом ашё етказиб бериш учун йўл харажатларини 50 фоизи Экспорт жамғармасидан қоплаб берилади.
Бундан ташқари, Саноатни ривожлантириш жамғармасидан Хоразмга 100 миллион доллар ажратиладиган бўлди.
Урганч тумани “Чакка-шоликор” қишлоғида технопарк ташкил қилиш, йил якунигача электротехника, тўқимачилик ва қурилиш материаллари йўналишида 100 миллион долларлик лойиҳаларни ишга тушириш вазифаси қўйилди. Бунга қўшимча ажратиладиган 25 миллион доллар ҳисобидан кичик ва ўрта саноат лойиҳаларига 1,5 миллиард сўмгача 18 фоиздан 7 йил муддатга кредитлар берилади.
Изоҳ (0)