Шавкат Мирзиёев Урганч шаҳридаги Khorezm Insulation Group қўшма корхонасини бориб кўрди. Бу ҳақда Президент матбуот хизмати хабар берди.
Ўзбекистонда сўнгги йилларда барча лойиҳаларда энергия тежамкорлик вазифаси қўйилмоқда. Шу боис базальт хом ашёсига талаб ошиб бораётир. Таҳлилларга кўра, мамлакатимизда бундай маҳсулотдан тайёрланган плиталарга йиллик талаб 80 минг тонна.
Шу жиҳатдан Khorezm Insulation Group қўшма корхонаси бозор конюнктураси асосида ташкил топди, дейиш мумкин. Қиймати 41 миллион евролик ушбу лойиҳада базальт хом ашёсидан иссиқлик сақловчи плиталар ишлаб чиқарилади. Хом ашё Қорақалпоғистон Республикасининг Қоратау тоғидан олиб келинади.
Корхонанинг йиллик қуввати 30 минг тонна бўлиб, қурилиш саноатига талаб юқори маҳсулотлар етказиб берилади. Шунингдек, Россия ва қўшни давлатларга 10 миллион долларлик экспорт қилиш имконияти яратилади.
Бунинг учун Германия, Туркия, Россия ва Хитой давлатларидан замонавий ускуналар келтириб ўрнатилмоқда. Корхонада 300 та янги иш ўрни очилади.
Президент корхона билан танишар экан, маҳсулотлар сифатини янада яхшилаш, маҳаллийлаштириш даражасини оширишга эътибор қаратиш лозимлигини таъкидлади.
Айни пайтда бу ерда йилига 15 минг тонна полипропилен ва полиэтилен тола ишлаб чиқаришни йўлга қўйиш бўйича ҳам иш олиб борилмоқда. Натижада 80 та янги иш ўрни яратилиши, яна 10 миллион долларлик экспорт қуввати яратилиши мўлжалланган.
Изоҳ (0)