НАТО бош котиби Йенс Столтенберг альянс Украинага ўз қўшинларини юборишни режалаштирмаётганини айтди. Бу ҳақда у Associated Press агентлигига маълум қилди.
Столтенбергнинг баёноти Франция президенти Эммануэль Макроннинг баъзи Ғарб давлатлари Украинага қуруқликдаги қўшинларини юбориш имкониятини кўриб чиқаётгани ҳақидаги сўзлари фонида эълон қилинди. НАТО бош котиби альянс Украинага кўп йиллар давомида мисли кўрилмаган ёрдам кўрсатаётганини айтди.
“Биз буни 2014 йилдан бери қиляпмиз ва кенг кўламли босқиндан кейин ҳаракатларимизни фаоллаштирдик. Аммо НАТОнинг жанговар қўшинларини Украинага жойлаштириш режаси йўқ”, — деди у.
Парижда 26 февраль куни Европа расмийлари иштирокида Украинани қўллаб-қувватлаш бўйича йиғилиш бўлиб ўтди. Унда Франция президенти Эммануэль Макрон Украинага қўшинлар юбориш эҳтимолини инкор этмади. Бу маълумотни Словакия бош вазири Роберт Фико ҳам қўллаб-қувватлади.
“НАТО ва Европа Иттифоқига аъзо қатор давлатлар ўз қўшинларини икки томонлама асосда Украинага юбориш имкониятини кўриб чиқаётганини айтиш билан чекланаман. Улар Украинада нима мақсадда ва нима қилиши кераклигини айта олмайман”, — деди Роберт Фико.
Ўз навбатида, Европанинг бошқа давлатлари — Польша, Чехия, Швеция Украинага ўз қўшинларини юборишни режалаштирмаганини билдириб, бу фикрни қўллаб-қувватламади.
Кремль муносабати
Кремль бу ҳолатда “биз Россия ва НАТО ўртасидаги тўғридан тўғри тўқнашув эҳтимоли ҳақида эмас, балки муқаррарлиги ҳақида гапиришимиз керак” дея муносабат билдирди.
Изоҳ (0)