Қашқадарёда хусусий университетга 3-босқичдан ўқишга киритишни ваъда қилган шахс қўлга олинди

Қашқадарё вилоятида ўқишга киритиб қўйиш билан боғлиқ фирибгарлик ҳолати фош этилди, деб хабар беради Бош прокуратура ҳузуридаги департамент.

Маълум қилинишича, Қарши туман бўлими, ДХХ ва ИИБ ходимлари ҳамкорлигида тезкор тадбир ўтказилган. Тадбирда Х.Н. исмли шахс фуқаро Г.Қ.ни гўёки юқори лавозимда ишловчи танишлари ёрдамида Қарши шаҳридаги “Иқтисодиёт ва педагогика университети” нодавлат олий таълим муассасасига 3-босқичдан ўқишга киритиб қўйиши эвазига 1,2 минг долларни олган вақтида ашёвий далиллар билан ушланган.

Мазкур ҳолат юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят иши қўзғатилиб, тергов ҳаракатлари ўтказилмоқда.

Бундан олдин Бухоро ва Фарғона вилоятларида ўқишни кўчириб бериш билан боғлиқ фирибгарлик ҳолатларига чек қўйилганди. Шунингдек, Ўзбекистоннинг қатор ҳудудларида ўқишга киритиб қўйиш учун пул олган ОТМ ходимлари қўлга тушган эди.