Коинотда рекорд даражадаги ёрқин ва тез катталашадиган қора туйнук аниқланди

Астрономлар коинотдаги энг ёрқин ва тез катталашадиган қора туйнукни аниқлади. Бу ҳақда Европа жанубий лабораторияси хабар берди.

Маълум қилинишича, бу илгари кашф этилган J0529-4351 квазар (атрофидаги ҳамма нарсани интенсив равишда сўрувчи қора туйнук) ҳисобланади. У Ердан 12 миллиард ёруғлик йили узоқликда жойлашган ва Қуёшдан 600 триллион марта ёрқинроқ. Ушбу қора туйнук атрофидаги дискининг диаметри Қуёш ва Нептун орасидаги масофадан 15 минг баравар кўп ва бу рекорд ҳисобланади. Ж0529-4351 нинг яна бир ўзига хос хусусияти шундаки, унинг нурланишига бошқа галактик ядроларнинг гравитацион линзалари таъсир кўрсатмайди.

Ушбу квазардаги қора туйнук ҳажми 17 миллиард қуёш массасига тенг ва кунига тахминан бир қуёш массасини ютади.

Олимларнинг таъкидлашича, квазарларни аниқлаш осон иш эмас, бунга кўпинча сунъий интеллект моделлари ёрдам беради. Квазарлар биринчи марта 1963 йилда кашф этилган. Ўшандан буён аниқланган бундай космик объектлар сони миллионга етди. Ж0529-4351 нинг хусусиятлари олимларга яқин келажакда катта қора туйнукнинг массасини аниқлашга, шунингдек унинг ўз ўқи атрофида айланишини кузатишга ёрдам беради.