2023 йилда Ўзбекистонга Россиядан пул ўтказмалари кескин камайган. Бу ҳақда 25 январдаги матбуот анжуманида Марказий банк раиси Мамаризо Нурмуродов маълум қилди.
Яқинда Марказий банк эълон қилган Меҳнат бозори шарҳида Ўзбекистон фуқароларига Россияда ишлаш учун берилган патентлар ва рухсатномалар сони 12 фоизга камайгани ёзилган. Матбуот анжуманида “Дарё” мухбири бу Ўзбекистонга Россиядан пул тушумларига қанчалик таъсир қилгани ҳақида савол берди. Мамаризо Нурмуродовнинг жавобига кўра, мигрантлар сонининг камайиши Россиядан пул ўтказмалари ҳажми пасайишига олиб келган.
“Ҳақиқатан биз пасайишни сездик. Лекин иккинчи томондан қараш керакки, Россиядан пул ўтказмалари камайгани билан бунинг географияси кенгайган бўлиши мумкин. Россиядан сезиларли камайиш кутмаяпмиз. Бу йилда ҳам пул ўтказмаларининг 5-6 фоиз ўсиши кутиляпти. Иккинчи томондан Россиядаги пул ўтказмаларига қанчалик таъсир қилди десангиз, умумий пул ўтказмалари 33 фоизга камайган бўлса, Россиядан пул ўтказмалари 39 фоизга камайди. Албатта, маълум бир жиҳатдан унинг таъсири (мигрантлар сони камайиши – таҳр.) бўлди. Аммо Россиядан бошқа давлатлардан бизга келадиган пул ўтказмалари 15 фоизга ошди. Ташқи меҳнат миграциясининг давлатлараро ўзгариши бизда пул ўтказмалари каналларининг ўзгаришига олиб келади. Лекин суммада маълум бир камайиш кутмаяпмиз”, — деди Марказий банк раиси.
Мамаризо Нурмуродов 2023 йилнинг июль ойидаги матбуот анжуманида Россия рублининг қадрсизланаётгани Ўзбекистонга пул ўтказмалари ҳажми камайишига олиб келаётганини айтганди.
“Россия рубли жорий йил бошидан бери 26 фоизга қадрсизланди. Энг аввало, бу мамлакатдан Ўзбекистонга бўлаётган пул ўтказмалари ҳажмига салбий таъсир қилади. Яъни Россиядан Ўзбекистонга пул ўтказмалари умумий хорижий тушумларнинг 80 фоизига яқинни ташкил этади. Масалан, 2022 йилнинг 6 ойида 6,5 миллиард доллар пул ўтказилган, жорий йил ярми ичида 5,1 миллиард доллар атрофида пул ўтказмалари амалга оширилди. Рубль қадрсизланиши тушумларимиз пасайишига таъсир кўрсатади”, —деган Марказий банк раиси.
Марказий банк раиси жорий йилнинг 25 январдаги матбуот анжуманида 2023 йилда сўмнинг алмашув курси қадрсизланиши 9,8 фоизни ташкил этганини маълум қилди.
Изоҳ (0)