Самарқанд вилояти ИИБ Коррупция ва иқтисодий жиноятларга қарши курашиш бўлими томонидан Оқдарё туманида тезкор тадбир ўтказилди. Бу ҳақда вилоят ИИБ ахборот хизмати хабар берди.
Маълум қилинишича, Давлат кадастрлар палатаси Самарқанд вилояти бошқармаси Оқдарё туман филиали ходими 39 ёшли Т.Д. фуқародан у томонидан сотиб олинаётган Оқдарё тумани “Пахтаобод” маҳалласида жойлашган турар жой тоифасидаги 0,30 гектар ер майдонини нотурар тоифага ўтказиб бериш ҳамда келгусида унинг номига кадастр ҳужжатларини расмийлаштириб беришни ваъда қилган.
Бунинг эвазига у 19,2 миллион сўм миқдорида пул талаб қилиб, Давлат кадастрлар палатаси Оқдарё туман филиали биносидаги ўз хизмат хонасида 12 миллион 550 сўм кимёвий ишлов берилган пулларини фирибгарлик йўли билан қўлга киритган вақтда ашёвий далиллар билан ушланган.
Ҳолат юзасидан Жиноят кодексининг тегишли моддаси билан жиноят иши қўзғатилиб, тергов ҳаракатлари олиб борилмоқда.
Аввалроқ Нукусда 900 млн сўмлик қурилиш объектини олиб беришни ваъда қилган фуқаро ушланганди. 2023 йил декабрда эса Оқдарё туманининг собиқ ҳокими тадбиркордан 200 минг доллар олаётганда қўлга тушган эди.
Изоҳ (0)