Миграция агентлиги томонидан чет тиллари курсларини тамомлаган 324 нафар фуқаро хорижга ишга юборилди

Миграция агентлиги томонидан чет тилларига ўқитиш курсларида икки мингга яқин фуқаро ўқитилмоқда.

Қайд этилишича, меҳнат миграцияси географиясини кенгайтириш натижасида аниқланган иш ўринларини тўлдириш учун номзодларни мақсадли тайёрлашга алоҳида эътибор қаратилмоқда. Бунда, бўлажак меҳнат мигрантларини касбларга ва хорижий тилларга ўқитиш бўйича Камбағалликни қисқартириш ва бандлик вазирлиги тизимидаги 32 та мономарказ ва унинг филиаллари, 53 та касб-ҳунарга ўқитиш маркази, 13 та қурилиш соҳаси малакали мутахассисларини тайёрлаш марказлари ҳамда бошқа турли вазирлик ва идоралар, нодавлат таълим муассасалари, 10 та хорижий ҳамкорлар билан ташкил этилган 48 та курслар имкониятларидан кенг фойдаланилмоқда.

Биргина ўтган йилда хорижда ишлаш истагида бўлган 58 228 нафар фуқаро чет тиллари ва касб-ҳунарга ўқишга жалб қилинди. Улардан 56 692 нафари (30 га яқин турдаги) касбларга, 1 536 нафари (немис, рус, инглиз, корейс, япон ва бошқа) чет тиллари курсларига йўналтирилди.

Шундан хорижий ташкилотлар билан ҳамкорликда ташкил этилган касб-ҳунар ва чет тилларига ўқитиш курсларига бугунги кунда 2 мингга яқин фуқаро ўқитилмоқда. Ушбу курсларни тугатган 324 нафар фуқаро хорижга ишга юборилди.

Қирол Сежонг корейс тили маркази – (KSIF) билан фуқароларни онлайн ўқитишга ихтисослашган корейс тили курслари фаолияти йўлга қўйилди. Бунинг учун республика ҳудудларидаги касб-ҳунарга ўқитиш марказларида алоҳида хоналар, Тошкент ва Наманган шаҳарларида студиялар ташкил этилди. Ҳозирда онлайн тартибда 500 нафардан ортиқ фуқаролар корейс тилига ўқитилмоқда. Келгусида мазкур студиялар орқали немис, инглиз ва япон тилларини ўқитиш ҳам йўлга қўйилади.

2023 йилнинг 8 сентябрь куни юк машина ҳайдовчиларини тайёрлаш учун “Ватанпарвар” нодавлат нотижорат ташкилоти билан ҳамкорлик келишуви имзоланди. Унга кўра, Европа давлатларида юк автомобили ва бошқа тоифадаги ҳайдовчилар учун аниқланган 11 минг иш ўрнини тўлдириш учун хорижда ишлаш истагида бўлган Ўзбекистон фуқаролари “Ватанпарвар” ННТнинг республика ҳудудларидаги курсларида ўқитилмоқда.