Ijtimoiy tarmoqlarda PPX xodimlari maktab o‘quvchisini mashinaga majburan tiqib olib ketishi aks etgan video tarqalib, keng muhokamalarga sabab bo‘ldi. Bolalar ombudsmani holat yuzasidan ma’lumot berdi.
Aniqlanishicha, 2023-yil 22-dekabr kuni Chilonzor tumani Chilonzor-3 mavzesida IIO xodimlari Sh.M. va A.O. 2011-yilda tug‘ilgan K.P.da pirotexnika vositalari borligini aniqlab, bolani xizmat mashinasiga kuch ishlatib, majburan o‘tqazishga uringan holda unga nisbatan qo‘pol va nomaqbul munosabatda bo‘lgan.
Buning oqibatida esa bola bosh sohasidan lat yegan va qattiq emotsional qo‘rqish holatiga tushgan.
Ichki ishlar xodimlariga nisbatan mazkur holat yuzasidan xizmat tekshiruvi o‘tkazilib, Sh.M. va A.O. harakatlarida voyaga yetmagan bolaga nisbatan qo‘pol munosabatda bo‘lish hamda IIV Kasb madaniyati kodeksini buzish yuzasidan hayfsan intizomiy jazosi qo‘llanilgan.
1-fevral kuni tasvirdagi bolaning onasi Bolalar ombudsmaniga murojaat qilgan.
“Huquqni muhofaza qiluvchi organ xodimlarining bola manfaatlariga zid bo‘lgan bu kabi harakatlariga mutlaqo yo‘l qo‘yib bo‘lmaydi va bunga javoban qonun doirasidagi qat’iy chora ko‘rilishi shart”, — deyiladi xabarda.
Qayd etilishicha, hozirda Bolalar ombudsmani so‘roviga ko‘ra Toshkent shahar prokuraturasi mazkur holatga huquqiy baho berish masalasini o‘rganmoqda.
Izoh (0)