Қорақалпоғистон Республикаси, Сирдарё ва Бухоро вилоятларида валюта айирбошлаш билан шуғулланиб келган шахслар ушланди, деб хабар беради Бош прокуратура ҳузуридаги департамент.
Маълум қилинишича, департамент ҳамда ДХХнинг Янгиер шаҳри бўлимлари томонидан тезкор тадбир ўтказилган. Тадбирда валюта айирбошлаш билан шуғулланиб келган Ў.Ш. ва В.С. жами 4 минг долларни фуқаро Ж.Р.га 49,9 миллион сўмга сотган вақтларида ашёвий далиллар билан ушланган.
Шу каби, департаментнинг Бухоро шаҳар бўлими томонидан ўтказилган тезкор тадбирда валюта айирбошлаш билан шуғулланиб келган М.М. фуқаро А.П.дан жами 3,3 минг долларни 40,8 миллион сўмга сотиб олган вақтида ашёвий далиллар билан ушланган.
Департаментнинг Беруний туман бўлими томонидан ИИБ ходимлари билан ҳамкорликда ўтказилган тезкор тадбирда эса валюта айирбошлаш билан шуғулланиб келган Н.Х. жами 275 минг Россия рублини фуқаро Х.И.дан 37,4 миллион сўмга сотиб олган вақтида ушланиб, унинг ёнидан 39 миллион сўм ва 100 доллар ашёвий далил сифатида олинган.
Мазкур ҳолатлар юзасидан Жиноят кодексининг 177-моддаси (валюта қимматликларини қонунга хилоф равишда олиш ёки ўтказиш) билан жиноят ишлари қўзғатилиб, тергов ҳаракатлари ўтказилмоқда.
Аввалроқ Андижон ва Қашқадарё вилоятларида валюта қимматликларини ноқонуний муомалага киритилишига чек қўйилгани тўғрисида хабар берилганди.
Изоҳ (0)