Qoraqalpog‘iston Respublikasi, Sirdaryo va Buxoro viloyatlarida valyuta ayirboshlash bilan shug‘ullanib kelgan shaxslar ushlandi, deb xabar beradi Bosh prokuratura huzuridagi departament.
Ma’lum qilinishicha, departament hamda DXXning Yangiyer shahri bo‘limlari tomonidan tezkor tadbir o‘tkazilgan. Tadbirda valyuta ayirboshlash bilan shug‘ullanib kelgan O‘.SH. va V.S. jami 4 ming dollarni fuqaro J.R.ga 49,9 million so‘mga sotgan vaqtlarida ashyoviy dalillar bilan ushlangan.
Shu kabi, departamentning Buxoro shahar bo‘limi tomonidan o‘tkazilgan tezkor tadbirda valyuta ayirboshlash bilan shug‘ullanib kelgan M.M. fuqaro A.P.dan jami 3,3 ming dollarni 40,8 million so‘mga sotib olgan vaqtida ashyoviy dalillar bilan ushlangan.
Departamentning Beruniy tuman bo‘limi tomonidan IIB xodimlari bilan hamkorlikda o‘tkazilgan tezkor tadbirda esa valyuta ayirboshlash bilan shug‘ullanib kelgan N.X. jami 275 ming Rossiya rublini fuqaro X.I.dan 37,4 million so‘mga sotib olgan vaqtida ushlanib, uning yonidan 39 million so‘m va 100 dollar ashyoviy dalil sifatida olingan.
Mazkur holatlar yuzasidan Jinoyat kodeksining 177-moddasi (valyuta qimmatliklarini qonunga xilof ravishda olish yoki o‘tkazish) bilan jinoyat ishlari qo‘zg‘atilib, tergov harakatlari o‘tkazilmoqda.
Avvalroq Andijon va Qashqadaryo viloyatlarida valyuta qimmatliklarini noqonuniy muomalaga kiritilishiga chek qo‘yilgani to‘g‘risida xabar berilgandi.
Izoh (0)