Тошкент шаҳри, Хоразм, Самарқанд ва Қашқадарё вилоятларида валюта қимматликларини ноқонуний муомалага киритилишига чек қўйилди, деб хабар беради Бош прокуратура ҳузуридаги департамент.
Маълум қилинишича, департаментнинг Мирзо Улуғбек туман бўлими томонидан ДХХ ва ИИББ ходимлари билан ҳамкорликда тезкор тадбир ўтказилган. Тадбирда валюта айирбошлаш билан шуғулланиб келган Қ.Ш., М.М. ва Д.К. жами 6 400 долларни фуқаро А.А.га 79,7 миллион сўмга сотган вақтларида ашёвий далиллар билан ушланган.
Шу каби, департаментнинг Хива туман бўлими томонидан ўтказилган тезкор тадбирда валюта айирбошлаш билан шуғулланиб келган Д.К. жами 4 минг долларни фуқаро Қ.Р.дан 49,5 миллион сўмга сотиб олган вақтида ашёвий далиллар билан ушланган.
Департаментнинг Самарқанд шаҳар бўлим томонидан ИИБ ва Миллий гвардия ходимлари билан ҳамкорликда ўтказилган тезкор тадбирда валюта айирбошлаш билан шуғулланиб келган А.Ж. жами 3,5 минг долларни фуқаро Д.Х.га 43,5 миллион сўмга сотган вақтида ашёвий далиллар билан ушланган.
Департаментнинг Яккабоғ туман бўлими томонидан ДХХ ва ИИБ ходимлари билан ҳамкорликда ўтказилган тезкор тадбирда эса валюта айирбошлаш билан шуғулланиб келган Т.М. ва А.Р. жами 3 минг долларни фуқаро Н.С.га 37,4 миллион сўмга сотган вақтида ашёвий далиллар билан ушланган.
Мазкур ҳолатлар юзасидан Жиноят кодексининг 177-моддаси (валюта қимматликларини қонунга хилоф равишда олиш ёки ўтказиш) билан жиноят ишлари қўзғатилиб, тергов ҳаракатлари олиб борилмоқда.
Аввалроқ Андижон ва Қашқадарё вилоятларида валюта қимматликларини ноқонуний муомалага киритилишига чек қўйилгани тўғрисида хабар берилганди.
Изоҳ (0)