11 январь куни Сенатнинг расмий сайтида “Миллий қонунчилигимизда ички ишлар органлари ходимларини тасвирга олишга ҳеч қандай тақиқ қўйилмаяпти” номли материал эълон қилинган бўлиб, унда қатор ривожланган давлатлар қонунчилигида ҳуқуқни муҳофаза қилувчи орган ходимларини суратга олиш тақиқлангани, муайян чоралар белгилангани кўрсатиб ўтилган.
BBС ўзбек хизмати Сенат тарқатган бу маълумотларни фактчек қилди.
Жумладан, Сенат хабарида Буюк Британияда кўчаларда ёки биноларида хизмат вазифаларини бажараётган ҳуқуқни муҳофаза қилувчи орган ходимларини уларнинг розилигисиз суратга олишни тақиқловчи норма мамлакат парламенти томонидан 2000 йилда тасдиқлангани айтилади.
BBС ўзбек хизматининг маълум қилишича, Буюк Британия полицияси фақатгина терроризм хавфи мавжуд бўлсагина, террорчи дея шубҳа қилинган шахсдан тасвирга олишни тўхтатишни сўраши мумкин. Шунда ҳам полицияда шубҳа қилиш учун кучли асос бўлиши керак. Агар кейинчалик у одам террорчи бўлиб чиқмаса, унда шубҳа қилган ва тасвирга олишни тўхтатган полициячининг ўзи жавобгарликка тортилади.
Шунингдек, Лондон полициясининг сайтида аҳоли учун эълон қилинган тавсияда жамоат жойларида бемалол тасвирга олиш мумкинлиги, полиция вакиллари фуқаролардан тасвирга олишни тўхтатишга ҳақли эмаслиги ёзиб қўйилган.
Сенат сайтида эълон қилинган Франция ҳақидаги маълумот ҳам нотўғри экани BBС ўзбек хизмати томонидан таъкидланди.
“Францияда полицияни тасвирга олишни тақиқловчи қонун 2021 йилнинг апрелида ҳақиқатан ҳам қабул қилинган, лекин ўша йилнинг ўзидаёқ Франция Конституциявий суди ушбу қонунни конституцияга зид дея топиб, уни бекор қилган”, — дейилади BBC видеолавҳасида.
Бундан ташқари, Сенатнинг 11 январдаги хабарида “Германияда полиция ходимларини суратга олиш тақиқланган эмас, бироқ ушбу фотосуратлар ёки видеоларни ижтимоий тармоқлар ва Интернетга жойлаштириш тақиқланган” дейилади.
BBС ўзбек хизматининг маълум қилишича, бу жумла чалғитувчи ахборотни ўзида жам этган.
“Ҳақиқатан, Германияда бошқа шахсларнинг тасвирини Интернетда тарқатиш мумкин эмас, аммо бу касбидан, лавозимидан, кимлигидан қатъи назар барча аҳоли учун тааллуқли қонун. Айнан орган ходимлари учун алоҳида ҳеч қанақа модда йўқ. Лекин агар полиция қонун бузаётган бўлса, унда бу ҳолатни тасвирга олиб, тарқатишга рухсат берилган, чунки жамоат манфаати шахсий ҳуқуқлардан устун қўйилади”, — дейилади BBC репортажида.
Мазкур ҳолатга муносабат билдирар экан, таниқли ҳуқуқшунос Хушнуд Худойбердиев қуйидагича ёзади: “Ана шунақа гаплар. Хулоса ўзингиздан. Сенаторлар ҳам хулоса қилади, деган умиддамиз. Ҳурматли сенаторларимиздан ёлғон асосига қурилган қонунни маъқулламасликларини сўраб қоламиз.”
Изоҳ (0)