Тошкент шаҳрида эркак учта хотинига алимент тўламагани учун 15 суткага қамалгани ҳақида хабар берилганди. МИБнинг “Дарё”га хабар беришича, эркакнинг қарзларини 4-хотини тўлади.
Қайд этилишича, Мажбурий ижро бюросининг Яшнобод туман бўлими иш юритувида 1987 йилда туғилган қарздор алимент тўловчи отадан фуқаролик ишлари бўйича Шайхонтоҳур туманлараро судининг 23.08.2021 йилдаги суд буйруғига асосан ундирувчи Ю.Г. фойдасига бир нафар вояга етмаган фарзанди таъминоти учун барча даромадларининг тўртдан бир қисми миқдорида алимент, фуқаролик ишлари бўйича Миробод туманлараро судининг 01.09.2022 йилдаги суд буйруғига асосан ундирувчи Ш.Н. фойдасига бир нафар вояга етмаган фарзанди таъминоти учун тўртдан бир қисми миқдорида алимент ҳамда фуқаролик ишлари бўйича Миробод туманлараро судининг 05.10.2017 йилдаги суд буйруғига асосан ундирувчи С.М. фойдасига бир нафар вояга етмаган фарзанди таъминоти учун тўртдан бир қисм миқдорида алимент ундириш белгиланган.
Қарздорнинг 2023 йил декабрь ойи ҳолатига 24 миллион 626 минг сўм алимент қарздорлиги вужудга келиб, бир неча маротаба огоҳлантиришларга қарамасдан, алимент пулларини тўлашдан бўйин товлаб келган.
Шу боис қарздорга нисбатан Маъмурий жавобгарлик тўғрисидаги кодекснинг 47-4-моддасига мувофиқ жавобгарлик масаласини кўриб чиқиш юзасидан ижро ҳужжати жиноят ишлари бўйича Яшнобод туман судига юборилган. 4 январь кунидаги суд қарорига асосан қарздорга нисбатан 15 сутка маъмурий қамоқ жазоси белгиланган бўлиб, қарздорнинг яқин қариндоши, аниқроғи, турмуш ўртоғи қарздорликни тўлиқ бартараф этган.
Шундан сўнг суд томонидан қарздорга нисбатан тўпланган ҳужжатлар қайта кўрилиб, етказилган зарар миқдори қоплангани сабабли жазони тўлиқ ўтамасдан озод қилинган.
Изоҳ (0)