Ўзбекистонда ҳарорат пасайиб, ёмғир ва қор ёғиши кутилмоқда

Ўзбекистон ҳудудига 22 январь куни Туркманистон ҳудудидан илиқ ҳаво массалари кириб келиши бошланади, деб хабар бермоқда “Ўзгидромет”.

Қайд этилишича, республика бўйича ёғингарчилик кутилмайди. Ҳаво ҳарорати кундузи илиқлик 9-12 даражагача исийди.

23—24 январь кунлари илиқ ҳаво кириб келиши давом этади, республика ҳудудининг катта қисмида қуёшли ва очиқ ҳаво кузатилади. 24 январда республиканинг шимоли-ғарбий ҳудудларига Волга бўйи ҳудудларидан нам ва совуқ ҳаво массалари кириб келиши бошланади.

Қорақалпоғистон Республикаси, Хоразм, Бухоро, Навоий вилоятларида баъзи жойларда ёғингарчилик (ёмғир, қор) бўлади. Республика ҳудудининг катта қисмида 23—24 январь кунлари ҳарорат кечалари 2-5 даража илиқ, кундуз кунлари 12-15 даража илиққача кўтарилади, шимолий ҳудудларда эса 24 январда кундузги ҳарорат 2-7 даражагача совийди.

25 январда нам ва совуқ ҳаво массалари мамлакатнинг барча ҳудудларини қамраб олади, республика бўйича ёғингарчилик (ёмғир, қор) бўлади. Ҳарорат кундузи 4-9 даража илиққача пасаяди, шимолий ҳудудларда кечаси 6-11 даража совуқни ташкил этади, кундузи 2-7 даража совуқдан ошмайди.

26 январда республика ҳудудининг катта қисмида ёғингарчилик бўлиши эҳтимоли сақланиб туради, шимоли-ғарбий ҳудудларда эса ёғингарчилик тўхтайди. Ҳарорат кечаси 2 даража совуқ-3 даража илиқ, кундузи 3-8 даража илиқ, шимолда кечаси 6-11 даража совуқ, кундузи 0-5 даража совуқ атрофида бўлади.

Тошкентда 22 январь куни қуёшли ва очиқ ҳаво бўлиши кузатилади. Ҳаво ҳарорати кундузи 10-12 даража илиқни ташкил этади. 23—24 январь кунлари пойтахтда ёғингарчилик кутилмайди. Сешанба куни кечаси ва эрталаб туман тушиши мумкин. Ҳаво ҳарорати 23 январда кечаси 0-2 даража илиқ атрофида бўлади, 24- январда кечаси 3-5 даража илиққача кўтарилади, кундузи 23—24 январда ҳарорат 12-14 даража илиқ атрофида бўлади.

25 январда Тошкентда вақти-вақти билан ёмғир ёғади. Ҳарорат кечаси 5-7 даража илиққача кўтарилади, кундузи 7-9 даража илиққача пасаяди.