Бухоро, Самарқанд, Навоий ва Тошкент вилоятларида табиий ресурс тармоқларига ноқонуний уланиш ҳолатлари фош этилди, деб хабар беради Бош прокуратура ҳузуридаги департамент.
Маълум қилинишича, департаментнинг Бухоро шаҳар бўлими томонидан терговга қадар текширув ўтказилган. Текширувда “Б.Л.” МЧЖ раҳбари Ф.Э. ва бошқалар тижорат мақсадида МЧЖга қарашли меҳмонхона биносини умумий фойдаланишдаги газ қувурига ўзбошимчалик билан улаб, 495,4 миллион сўмлик табиий газдан ноқонуний фойдалангани аниқланган.
Шу каби, департаментнинг Пастдарғом туман бўлими томонидан ўтказилган терговга қадар текширувда “С.I.” оилавий корхонаси раҳбари С.Р. корхонага қарашли иссиқхона газ таъминотидан қарздорлиги сабабли тармоқдан узилган бўлса-да, тармоққа ўғирлик йўли билан қайта уланиб, 318,7 миллион сўмлик табиий газдан ноқонуний фойдалангани маълум бўлди.
Департаментнинг Кармана туман бўлими ва ИИБ ходимлари ҳамкорлигида ўтказилган тезкор тадбирда “А.Й.” оилавий корхонаси газ таъминоти корхонаси билан шартнома тузмасдан тармоққа уланиб, 144,9 миллион сўмлик табиий газдан ноқонуний фойдалангани аниқланган.
Шунингдек, департаментнинг Тошкент тумани бўлими томонидан ЭТК ходимлари билан ҳамкорликда ўтказилган тезкор тадбирда фуқаро А.Б. “Қизғалдоқ” МФЙ ҳудудида жойлашган савдо дўконини ҳеч қандай ҳужжатсиз ўғрилик йўли билан умумий фойдаланишдаги электр тармоғига улаб, жами 134,5 миллион сўмлик электр энергиясидан ноқонуний фойдалангани маълум бўлди.
Мазкур ҳолатлар юзасидан Жиноят кодексининг 169-моддаси (ўғрилик) билан жиноят ишлари қўзғатилиб, тергов ҳаракатлари ўтказилмоқда.
Аввалроқ Ўзбекистонда декабрь ойининг 15 кунида айрим истеъмолчиларнинг электр энергияси ва табиий газдан ноқонуний фойдаланиши натижасида давлат манфаатларига 73 миллиард 274 миллион сўмлик зарар етказилгани тўғрисида хабар берилганди.
Изоҳ (0)