Россия ташқи ишлар вазири Сергей Лавровнинг айтишича, BRICS’га аъзо давлатлар ўртасида ягона валюта яратиш масаласи муҳокама қилинмаяпти. Шу билан бирга, АҚШ назоратидаги тизимга боғлиқ бўлмаган ўзаро савдо ва ҳисоб-китоблар варианти кўриб чиқилаётганини маълум қилди.
“Ҳозир ҳеч ким ягона валюта ҳақида гапирмаяпти. Ҳозирда барча эътибор ўзаро савдо ва иқтисодий лойиҳалар, сармояларни Қўшма Штатлар ва унинг Ғарб иттифоқчилари назорат қиладиган тизимга боғлиқ бўлмаган ҳолда амалга ошириш йўлларини топишга қаратилмоқда”, — деди Лавров.
Сергей Лавров ўзаро савдода миллий валюталардан фойдаланиш, кейин эса муқобил тўлов тизимини яратиш учун асос бўлиши керак бўлган BRICS захира валюталари лойиҳасини эслатди.
“Бу қандай кўринишга эга бўлиши ҳақида молия вазирлари ва марказий банклар раислари шуғулланишади”, — деб тушунтирди вазир ва 2024 йилда Қозонда бўлиб ўтадиган саммит учун давлат раҳбарлари учун тавсиялар тайёрланишини қўшимча қилди.
Россия молия вазири Антон Силуанов 22 август куни BRICS мамлакатлари долларга муқобил ягона ҳисоб бирлигини яратиши мумкинлигини айтганди.
Изоҳ (0)