30 дан ортиқ давлат у ёки бу тарзда Украина ҳарбийларини хорижда тайёрлаш бўйича тадбирларни ташкил этишда иштирок этмоқда. Бу ҳақда Украина Қуролли кучлари Бош штаби доктриналар ва тайёргарлик бош бошқармаси бошлиғи, генерал майор Алексей Таран маълум қилди.
“Ҳозирда 34 та давлатдан иборат ҳамкорлар коалицияси Украина Қуролли кучлари ходимларини хорижда ўқитиш тадбирларини ташкил этишда иштирок этмоқда”, — деди Таран Украинанинг Army-inform агентлигига берган интервьюсида.
Унинг сўзларига кўра, бу давлатлар орасида АҚШ, Буюк Британия, Европа Иттифоқининг аксарият давлатлари, Канада, Норвегия, Австралия, шунингдек, Грузия ва Молдова бор.
Таран қўшимча қилишича, Буюк Британия асосий қўшма қуролларни тайёрлаш, шунингдек, кичик қўмондонларни тайёрлашни ташкил этишда сўзсиз етакчига айланди. Унга кўра, 2022 йил февралидан буён Британияда 30 мингдан ортиқ, 2014 йилдан буён эса 50 мингдан ортиқ ҳарбий хизматчи тайёрланди.
2023 йилнинг ноябрида Буюк Британия мудофаа вазири ўринбосари Жеймс Хиппи мамлакат 2024 йилда украиналик ҳарбийларни тайёрлашни давом эттириши ва бу борада етакчиликни сақлаб қолиш ниятида эканини айтган эди. Бироқ у британиялик инструкторлар 2024 йилда Украина Қуролли кучларининг қанча жангчисини тайёрлашни режалаштираётганига аниқлик киритмаган.
Изоҳ (0)