Ўзбекистонда Аи-80 бензинидан босқичма-босқич воз кечиш режалаштирилмоқда. Бу ҳақда Энергетика вазирлиги матбуот хизмати “Хабар.уз”га маълум қилган.
Қайд этилишича, Аи-80 бензини кўп мамлакатларда тақиқланган бўлиб, ҳатто нефть маҳсулотларини тўлиқ импорт қиладиган Қирғизистон ва Тожикистонда ҳам аллақачон истеъмолдан олинган. Ҳозирча минтақада фақат Ўзбекистон ва Афғонистонда Аи-80 бензинидан фойдаланиш давом этмоқда.
Вазирликнинг билдиришича, 2025 йилга бориб Фарғона нефтни қайта ишлаш заводида Аи-80 ишлаб чиқарилиши тўхтатилса, 2026 йилга бориб Бухоро нефтни қайта ишлаш заводи тўлиғича сифатлироқ ёқилғи ишлаб чиқаришга ўтказилади.
Ёқилғи бозорида тақчиллик кузатилмаслиги ва истеъмолда узилиш бўлмаслиги учун чора-тадбирлар режалаштирилган. Хориждан бензин олиб кирувчи субъектлар фаолиятини кенгайтириш орқали истеъмол бозорини бир маромда ушлаб турилади. Tatneft, Saneg ва “Лукойл” каби хорижий сармоядорларга кўпроқ заправкалар қуриш имкони берилади.
“Натижада маҳаллий тадбиркорлар билан бўладиган рақобат самараси ўлароқ бозорда ёқилғи сифати ва нарх барқарорлигига эришиш режалаштирилган”, — дейилади хабарда.
Маълум қилинишича, айни вақтда Аи-80 бензинига нарх белгилашда маълум чегарадан ўтмаслик бўйича таклиф тайёрланмоқда. Худди метан газ заправкаларида бир метр куб газ учун энг юқори нарх 3250 сўм этиб белгиланганидек, Аи-80 бензинига ҳам маълум қиймат таклиф этилади.
Изоҳ (0)