Ўзбекистон президентининг 29 декабрдаги фармони билан Жавлон Ваҳобов Марказий Осиё халқаро институти (МОХИ) директори этиб тайинланди. Бу ҳақда институт матбуот хизмати хабар берди.
Минтақада ягона давлат илмий-тадқиқот муассасаси, яъни Марказий Осиё халқаро институти Шавкат Мирзиёевнинг ПҚ-4811-сон қарорига мувофиқ ташкил этилган. Институтнинг асосий вазифаси Марказий Осиё минтақаси мамлакатларида рўй бераётган ташқи сиёсий, ички сиёсий ва ижтимоий-иқтисодий жараёнларнинг асосий тенденцияларини ҳар томонлама ва чуқур ўрганиш асосида амалий таклиф ва тавсиялар ишлаб чиқишдан иборат.
Жавлон Ваҳобов 2017-2023 йиллар давомида Ўзбекистоннинг АҚШ, Канада ва Бразилиядаги элчиси лавозимида фаолият юритди. 2023 йил март ойида Ўзбекистон ташқи ишлар вазирининг биринчи ўринбосари Фурқат Сиддиқов Ўзбекистоннинг АҚШдаги элчиси этиб тасдиқланган эди.
Эслатиб ўтамиз, 2023 йил январда Шавкат Мирзиёевнинг тегишли фармони билан собиқ ташқи ишлар вазири Владимир Норов Марказий Осиё халқаро институти директори этиб тайинланганди. Июнь ойида эса Норов Twitter'даги саҳифаси орқали нафақага чиққанини эълон қилди.
Изоҳ (0)