Вилли Вонканинг шоколад фабрикасига саёҳатга келган болакай Чарли ҳикояси деярли ҳаммага маълум. Аммо 21 декабрь куни бутун дунё бўйлаб Тимоти Шаламе иштирокидаги “Вонка” преквели чиқди. Фильм ниҳоятда ёқимли бўлиб унда қайғули лаҳзалар кўп, лекин ҳеч қандай шубҳа йўқки, яхшилик ғалаба қозонади.
Бу бутун оила кўрадиган ажойиб эртак
Ёш хаёлпараст Вилли Вонка (Тимоти Шаламе) шоколад фақат бойлар учун мавжуд бўлган маълум бир шаҳарга келади. У ўз маҳоратига, янги таъмларни ўйлаб топиш истеъдодига таяниб, ширинликлар дўконини очишни режалаштирган. Аммо биринчи куниёқ қаҳрамон бор пулидан айрилади ва меҳмонхона эгаларига қул бўлиб қолади. Аммо Вонка таслим бўлмайди. Етим болакай Нудл (Кала Лейн) ва фирибгарлар томонидан қул бўлган бошқа одамларнинг кўмагида у янги рецептлар ўйлаб топади ва ўз бизнесини бошлаш йўлларини қидиради. Бу йўлда ҳатто полицияга пора берган шоколад ишлаб чиқарувчилар картелига қарши туришга мажбур бўлади.
“Вонка” ҳақида билишингиз керак бўлган биринчи ва энг муҳим нарса: фильм режиссёри Пол Кинг бўлиб, у томошабинларга сўнгги ўн йилликдаги асосий эртак ҳикоялардан бири — “Паддингтоннинг саргузаштлари”нинг икки қисмини тақдим этган. Ростини айтганда, янги фильм кўп жиҳатдан “Чарли ва шоколад фабрикаси”дан кўра ёқимтой айиқ ҳақидаги фильмга яқинроқ. Бу ҳам нотаниш жойга мослашишга уринаётган, яқинларини топиб, адолатни тиклаган меҳрибон ва содда қаҳрамон ҳақидаги ҳикоя.
Бош қаҳрамоннинг муҳим бир афзаллиги бор: у қўшиқ айтади. “Вонка” — барча ёшдагилар учун классик мусиқий асар. Афсуски, чинакам эсда қоларли куйлар унчалик кўп эмас; энг жозибалилари 1971 йилги фильмдаги Пуре Imagination ва умпа-лумпа мавзуси бўлиб қолади. Аммо Тимоти Шаламенинг қўшиқ айтиши ва рақсга тушишини томоша қилишдан завқланиш мумкин.
Бош қаҳрамонларнинг меҳрибонлиги ва позитивлиги сизни биринчи дақиқаларданоқ ўзига ром этади. Муаллифлар дарҳол Вонка муҳтожларга ёрдам бериш учун сўнгги пулларини беришга тайёрлигини кўрсатади, шу билан бирга у шоколадни жуда арзон сотишни режалаштирмоқда. Умуман олганда, Вонка буларнинг барчасини онасининг хотираси учун қилади — хайриятки, муаллифлар Бёртон фильмидаги болакайнинг қора тарихни ўзгартиришади. Аввалги фильмда қаҳрамоннинг болалиги зўравон отаси, ширинликлар ейиш тақиқланганлиги ва қўрқинчли брекетлар билан тасвирланганди.
Қаҳрамонларнинг муаммолари ҳам жуда реал
Аммо “Вонка” энг ижобий ҳикоя бўлса ҳам қора ҳазилни ҳам, қийин вазиятларни ҳам яхши кўрадиган Роалд Дал асарларининг атмосферасини сақлаб қолади. Бу фильм воқеаларини хиралаштирмайди, шунчаки қаҳрамонларга ҳамдард бўлишга ёрдам беради.
Янги фильмда муаллифлар қайта-қайта Вилли Вонкага умуман ҳайратланарли бўлмаган муаммоларни тақдим этишади: шартномадаги кичик ҳарфлар, ишлаб чиқарувчилар ўртасидаги келишув, полициядаги коррупция, расмийларга ёқмаган одамларга нисбатан жисмоний куч ишлатишгача. Сиз эртак оламида шафқатсиз реализмнинг баъзи элементларини кўрасиз.
Бироқ бу билан “Вонка” коррупция ва фирибгарларга қарши кураш ҳақидаги фильмга айланиб қолмайди, бир оз “Паддингтон саргузаштлари 2”га ўхшайди — жиноий детектив ва қамоқхона драмаси.
“Оскар” мукофоти совриндори Оливия Колман айёр меҳмонхона эгаси ролини ақл бовар қилмайдиган иштиёқ билан ўйнайди, Роуэн Аткинсон эса қабиҳ руҳоний сифатида ҳар бир ҳаракати билан томошабинни кулдиради.
Тўғрисини айтганда, “Вонка” ижодкорлари бундай тажрибали актёрларни антагонист ролларини ўйнашга таклиф қилишлари бежиз эмас. Баъзан улар Шаламедан ҳам ўзиб кетишади.
“Вонка” бу — таниш ҳикоянинг ажойиб преквели
Сўнгги йилларда машҳур қаҳрамонлар, жумладан, эртаклар ҳақида ҳикоя қилувчи жуда кўп фильмлар чиқарилди. Бундай ҳикоялардан бири — “Круэлла”. Фильм воқеалари жуда қизиқарли, аммо у “101 далматин”даги ёвуз образга мос келмайди.
Шаламенинг қаҳрамони ҳам меҳрибон — у ҳали ёш хаёлпараст. Шунингдек, Хью Грант аввалги фильмда бўлган митти қаҳрамонлар — умпа-лумпа образида намоён бўлади ва ҳатто таниш оҳангда қўшиқ куйлайди ва бу оҳангни унутиб бўлмайди.
Пол Кинг “Паддингтон 3”ни суратга олишдан бош тортиб, уни “Вонка”га алмаштиргани бежиз эмас. Ёқимтой кичкина айиқ ҳақидаги франшиза усиз ҳам давом этади. Аммо янги эртак ҳақиқатан ҳам томошабинларга завқ бағишлайди. Бундан ташқари, фильм қишда экранларга чиқди: бир томондан, мўжизавий Янги йил олдидан, бошқа томондан совуқ ва қуёш етишмаслиги даврида.
Изоҳ (0)