“Эзгулик” жамияти раҳбари Абдураҳмон Ташанов Facebook’даги саҳифасида Тошкент вилоятида судья вафот этган шахсни жаримага тортгани ҳақида пост қолдирди. Постга расмий муносабат билдираркан, Судьялар олий кенгаши ҳолат аслида бошқача бўлганини изоҳлади.
Абдураҳмон Ташановнинг ёзишича, судья ҳукм чиқарган марҳум тўрт йил илгари вафот этган.
“Бугун қўлимга тушган суд қарорида Чирчиқ суди судьяси Равшанов 4 йил аввал оламдан ўтган одам – Абдукарим Манноновга сўроқ қилмасдан ҳам жарима солибди ва унга мажбуриятлар юклабди. Бу шу йилнинг августида бўлган воқеа, эски йилда қолсин, дедим”, — дея қайд этган инсон ҳуқуқлари фаоли.
Судьялар олий кенгаши ижтимоий тармоқларда муҳокамаларга сабаб бўлган мазкур хабар юзасидан муносабат билдирди. Кенгаш изоҳига кўра, судда марҳум жаримага тортилгани ҳақидаги иддао ёлғон.
“Шу йилнинг август ойида фуқаролик ишлари бўйича Чирчиқ туманлараро судида ноқонуний қурилмани бузишга оид низо кўрилган. Мазкур фуқаролик низоси бўйича бир эмас, учта жавобгар бўлиб, улардан (жавобгарлардан) бири суд мажлиси бўладиган кун ва соат маълум қилинган бўлса-да, процессга келмагани, бунинг сабаблари ҳам судга маълум қилинмагани рост. Натижада низо унинг иштирокисиз кўрилиб (бунга қонунда монелик йўқ), даъво қисман қаноатлантирилади ва бошқа жавобгарлар қатори унга ҳам ноқонуний қурилмани ўз ҳисобидан бузиш мажбурияти юклатилади. Бундан ташқари, ҳал қилув қарорида барча жавобгарлардан тегишли давлат божи солидар тартибда ундирилиши ҳам белгиланади.
Кейинчалик, фуқаролик иши Тошкент вилоят суди апелляция инстанциясида кўрилганда ўша жавобгар тўрт йил аввал вафот этгани, ўтган вақт давомида унинг мол-мулки (уй-жойи ва унга туташ низога сабаб бўлиб, ноқонуний қурилгани айтилаётган дарвозахона) мерос ҳуқуқи асосида фарзандига ўтиб, меросхўр бошқа шахсга, у эса яна бошқа бировга сотилгани маълум бўлади. Эътиборлиси, бу ҳақда биринчи инстанция судига на даъвогар, на бошқа жавобгарлар маълум қилган?!
Хуллас, ҳамма-ҳаммаси иш апелляция инстанциясида кўрилганда ойдинлашгач, ишга манфаатдор шахсларни жалб этишда процессуал хатоликларга йўл қўйилганлиги асоси билан ҳал қилув қарори ўшандаёқ (15.11.2023-й.) бекор қилиниб, фуқаролик иши мазмунан қайта кўриш учун биринчи инстанция судига юборилган. Айни пайтда фуқаролик иши биринчи инстанция судида қайта кўрилмоқда”, — дея маълум қилган Судьялар олий кенгаши.
Кенгаш изоҳида ҳолат Тошкент вилоят судлари судьялари малака ҳайъатида ҳам кўриб чиқилишини билдирган.
“Фуқаролик судида мазмунан кўрилиб чиқилган ишлар якуни бўйича тарафларга жарима жазоси қўлланмайди. Давлат божи ундирилади. (Чирчиқдаги ҳолат бўйича ҳал қилув қарори бекор қилиниши ортидан жавобгарлардан давлат божи ундирилишининг ҳуқуқий қуввати ҳам йўқолган). Давлат божи эса жарима эмас. Божни жарима сифатида талқин қилиб, жамоатчиликка тақдим этилгани эса муаллифнинг закийлигига бир оз шубҳа пайдо қилмоқда, холос”, — дейилади кенгаш муносабатида.
Эслатиб ўтамиз, июль ойида Олий суд масъули мурожаатчига жавоб хати ёзиб, 12 йил аввал вафот этган фуқаро қамоқдалигига ишора қилганди.
Изоҳ (0)