Тошкент вилоятида суд 4 йил олдин вафот этган марҳумни жаримага тортди

Тошкент вилояти Чирчиқ шаҳрида суд бундан 4 йил аввал вафот этган фуқарони жаримага тортди. Бу ҳақда Инсон ҳуқуқлари эзгулик жамияти раиси Абдураҳмон Ташанов хабар берди.

Маълум қилинишича, суд қарорида Чирчиқ суди судьяси Р. 4 йил аввал оламдан ўтган одам — Абдукарим Манноновга жарима белгилаб, унга мажбуриятлар юклаган.

“Бу шу йилнинг августида бўлган воқеа, эски йилда қолсин, дедим. Аммо ҳар сафар бунақанги қовунлар ҳақида ёзганимизда Олий суд ва Судьялар олий кенгашининг мутафаккир раҳбарлари пешонаси тиришаркан — муаммо ижобий ҳал бўлмайди”, — деб ёзади Ташанов. 

Ушбу суд қарорини қандай қилиб ижро этиш мумкин? Бу англашилмовчиликми ёки масъулиятсизлик?

Экология, атроф-муҳитни муҳофаза қилиш ва иқлим ўзгариши вазири маслаҳатчиси Расул Кушербаев ҳам мазкур ҳолатга эътибор қаратди. “Ушбу суд қарорини қандай қилиб ижро этиш мумкин? Бу англашилмовчиликми ёки масъулиятсизлик?”, деб ёзади у.

Эслатиб ўтамиз, июль ойида Олий суд масъули мурожаатчига жавоб хати ёзиб, 12 йил аввал вафот этган фуқаро қамоқдалигига ишора қилганди.