Қашқадарёда 10 нафар чин етим фуқарога бепул уй-жой берилди, Олий таълим муассасаларида ўқиётган 100 нафар талаба қизнинг контракт пули тўлаб берилди. Бу ҳақда «Дарё» мухбири маълум қилди.

Маълум бўлишича, вилоят раҳбари Зоир Мирзаев Қарши шаҳридаги ИТ-марказида 23 октябрь куни бир неча йилдан бери уйсиз яшаб келаётган чин етим фуқароларга бепул уй-жойлар калитини топширган. Шунингдек, кам таъминланган оила фарзандларининг контракт пули тўлаб берилганини маълум қилган.

«2004 йилдан бери уйсиз, ижарама-ижара яшаб келаётгандик. Кейинчалик ётоқхона ҳам берилди. Аммо барибир ўз уйимиз бўлишини орзу қилардик. Бугун шу орзумиз амалга ошди», — дейди 30 ёшли эр-хотин Акмал ва Нигора.

Акмал Мурхабинов ҳамда Нигора Шаханованинг айтишича, улар бундан икки йил илгари турмуш қурган бўлиб, уй-жой олиш илинжида хорижга чиқиб, ишлаб ҳам келган. Аммо уй сотиб олиш учун маблағ йиғолмаган.

«Президент томонидан имзоланган ‘Етим болалар ва ота-она қарамоғидан маҳрум бўлган болаларни давлат томонидан қўллаб-қувватлашнинг янги тизимини жорий этиш чора-тадбирлари тўғрисида’ қарори ижросини таъминлаш мақсадида бугун яна 10 нафар чин етим фуқароларга шинам хонадонлар калити топширилди. Бунинг учун маҳаллий бюджетдан 1 миллиард 737 миллион сўм маблағ ажратилди», — дейди вилоят ҳокими матбуот котиби Аҳрор Содиқов.

Қарши давлат университети ахборот хизмати раҳбари Ойбек Юсуповнинг маълумот беришича, контракт пули тўлаб берилган талабаларнинг 59 нафари вилоятдаги педагогика университети талабалари ҳисобланади.

Қарши давлат университетининг 4-босқич талабаси Муҳтарам Сувонованинг айтишича, вилоят ҳокимлиги унинг 6 миллион 412 минг 610 сўмлик контракт пулини тўлаб берган.

«Тўғриси, бундай рағбат ва қўллаб-қувватлаш шахсан менга катта куч беради. Бунинг учун масъулларга раҳмат», — дейди Муҳтарам Сувонова.