Болалар омбудсманининг хабар беришича, Қашқадарё вилоятида 17 ёшли ўқувчи қиз тўйи тўхтатилган.
Маълум қилинишича, Болалар омбудсмани эрта никоҳлар ва мактаб ёшидаги қизларга нисбатан унаштирув маросимларини ўтказилиши каби салбий ҳолатлар юзасидан Қашқадарё вилоятининг Кўкдала, Касби ва Косон туманларида ўрганишлар ўтказди.
22 — 23 декабрь кунлари Бола ҳуқуқлари бўйича вакил — Болалар омбудсмани Сурайё Раҳмонова Косон, Касби ва Кўкдала туманларида бўлди. Унинг иштирокида ўтказилган йиғилишларда бугунги долзарб ва оғриқли масала — эрта никоҳ ҳолатларини олдини олиш ва бу борада масъуллар олдида турган муҳим вазифалар муҳокама этилди.
Шунингдек, Болалар омбудсмани шу кунларда ижтимоий тармоқларда эълон қилинаётган вояга етмаган қизларнинг турмушга берилгани ҳақидаги хабарларни ҳам ўрганди. Ҳолатлар таҳлил қилинди.
Ташкил қилинган учрашувларда фарзандларини эрта турмушга бермоқчи бўлган ота-оналар ҳам чақиртирилиб, уларга эрта никоҳнинг салбий оқибатлари тушунтирилди. Бу ҳолатларга йўл қўйган ота-оналар Маъмурий ва Жиноят кодекслари билан белгиланган тартибда жавобгарликка тортилиши эслатилди.
Болалар омбудсмани унаштирув маросими ўтказилган деб ижтимоий тармоқларда хабар тарқаган ҳар бир қиз билан учрашиб, улар билан алоҳида суҳбат ўтказди.
Шунингдек, туманларда ўрганиш ва таҳлиллар олиб борилди. Бугун, 23 декабрь кунининг ўзида туман ҳокимияти билан биргаликда Косон туманидаги бир оила 17 ёшли қизининг тўйини белгилагани аниқланиб, тўй ва унга боғлиқ барча маросимлар тўхтатилди. ФҲДЁ томонидан қайд этилган никоҳ гувоҳномаси бўлмай шаръий никоҳ ўқиган диний вакилни жавобгарликка тортилиш чоралари кўрилди. Бу борадаги ишлар тизимли равишда давом этади.
Изоҳ (0)